Կարելի էր գրել՝ բոլոր սեւերը, որոնց ցուցակը հաստատում է վարչապետը, ենթակա են ոչնչացման. Գորգիսյան
ՔԱՂԱՔԱԿԱՆԵթե Սահմանադրության փոփոխման ընթացակարգից դուրս ենք հանում Սահմանադրական դատարանին, հայտնվում ենք մի իրավիճակում, երբ ԱԺ–ի մեծամասնության բերած նախագիծը կարող է միանգամից գնալ հանրաքվեի` առանց ստուգելու դրա սահմանադրականությունը։ Այս մասին այսօր՝ փետրվարի 6–ին, ԱԺ ամբիոնից հայտարարեց ԱԺ «Լուսավոր Հայաստան» խմբակցության պատգամավոր Գեւորգ Գորգիսյանը։
Նրա խոսքով՝ նույն հաջողությամբ կարող էին բերել կյանքի իրավունք ունենալու մասին սահմանադրության փոփոխություն.
«Սահմանադրությամբ հաստատված է, որ ամեն ոք ունի կյանքի իրավունք, մեր գործընկերները կարող էին դա փոխել, ենթադրենք, այսպես՝ բոլոր սեւերը, որոնց ցուցակը հաստատում է ՀՀ վարչապետը, ենթակա են ոչնչացման, այս ընթացակարոգով կարող են»։
Գորգիսյանի խոսքով՝ չկա որեւէ օղակ, որը կարող է հետ պահել այս գործընթացից. «Այս պարագայում, երբ ՍԴ–ին հանում ենք դուրս, չկա որեւէ օղակ, որեւէ մարմին, որը կարող է հետ պահել այս գործընթացից, չկա որեւէ մարմին, որը կարող է փոխզսպել այս պարագայում Սահմանադրության նման հակասահմանադրական փոփոխությունները։ Իրավական երկիր չի կարելի կառուցել օրենքների խախտմամբ եւ սահմանադրության ոտնահարմամբ, եւ հենց սրանով են զբաղված մեր գործընկերները։ Հիմա փաստացի արվում է այն, ինչում մեր գործընկերները մեղադրում են Հրայր Թովմասյանին, որ նա պահպանելով օրենքի տառը՝ խախտել է օրենքի եւ Սահմանադրության ոգին»։