Կորոնավիրուսի հետևանքով մահացել է ավելի քան 100 մարդ. Առողջապահության համաշխարհային կազմակերպություն

 

Չինաստանի սահմաններից դուրս նոր կորոնավիրուսով վարակվել է ավելի քան 7 հազար մարդ։ Այս մասին ասվում է Առողջապահության համաշխարհային կազմակերպության (ԱՀԿ) մարտի 1-ին հրապարակված զեկույցում։

Նշվում է, որ վերջին մեկ օրվա ընթացքում Չինաստանից դուրս հիվանդության 1160 նոր դեպք է արձանագրվել, վարակվածների ընդհանուր թիվը հասել է 7169-ի:

Վարակակիրների թվով առաջին տեղում է Հարավային Կորեան՝ վերջին մեկ օրվա ընթացքում 586 մարդ, երկրորդ տեղում Իտալիան՝ 240 նոր դեպք, երրորդը՝ Իրանը, որտեղ հաստատել են վարակման 205 դեպքի մասին:

Վիրուսը տարածվել է 58 երկրներում։ Ընդհանուր առմամբ ՉԺՀ-ի սահմաններից դուրս կորոնավիրուսի հետևանքով 104 մարդ է մահացել:

Կորոնավիրուսի համաճարակի մասին Չինաստանի իշխանություններն ԱՀԿ-ին հայտնել էին դեկտեմբերի 31-ին: Հայտնի է, որ վիրուսը տարածվել է Հուբեյ նահանգի Ուհան քաղաքից: Չինաստանում COVID-19 վարակի հաստատված դեպքերի թիվը հասել է 80 026-ի, որոնցից 2912-ը՝ մահվան ելքով:

Հիշեցնենք, որ երեկ՝ մարտի 1-ին, պաշտոնապես հայտարարվեց Հայաստանում կորոնավիրուսի վարակման դեպքի մասին։ Վարակակիրն Իրանից Հայաստան վերադարձած ՀՀ քաղաքացի է, որի մոտ սկզբնական շրջանում հիվանդություն չի ախտորոշվել, իսկ մեկ օր անց վերջինս դիմել է բուժկենտրոն և հաստատվել է վիրուսի առկայության փաստը։ Այս պահին այդ քաղաքացին և նրա հետ ինքնաթիռով վերադարձած ևս 31 անձ գտնվում են Ծաղկաձորի հյուրանոցներից մեկում՝ հատուկ պահպանման պայմաններում։ Հավելենք նաև, որ կորոնավիրուսի հետևանքով մեկ շաբաթով դադարեցվել է Հայաստանի բոլոր ուսումնական հաստատությունների աշխատանքը։