Իսպանիայում կորոնավիրուսի հետևանքով զոհերի թիվը գերազանցել է 8000-ը․ վերջին 1 օրվա ընթացքում մահացել է 849 մարդ․ «ՌԻԱ Նովոստի»
ՄԻՋԱԶԳԱՅԻՆԻսպանիայում առողջապահության նախարարության տվյալների համաձայն՝ նոր տեսակի կորոնավիրուսի հետևանքով զոհերի թիվը գերազանցել է 8000-ը, միայն վերջին մեկ օրվա ընթացքում 849 հիվանդ է մահացել, գրում է ria.ru-ն։
Նախարարության հաղորդմամբ՝ մեկ օրում գրանցվել է վարակման 9200 նոր դեպք, կորոնավիրուսով վարակվածների ընդհանուր թիվը 94 400 Է, որից 8189-ը՝ մահվան ելքով: Ինտենսիվ թերապիայի բաժանմունքներում գտնվում Է 5600 հիվանդ, 19 300 մարդ ապաքինվել է։
Մայրաքաղաք Մադրիդում համավարակի սկսվելուց ի վեր արձանագրվել է հիվանդության 27 500 դեպք, որից 3600-ը՝ մահվան ելքով: Կատալոնիայում գրանցված դեպքերի թիվը 18 800 է, 1700-ը՝ մահվան ելքով։
Իսպանիան կորոնավիրուսի հաստատված դեպքերի թվով (ԱՄՆ-ից և Իտալիայից հետո) աշխարհում երրորդ տեղում է և երկրորդ տեղում է զոհերի թվով (Իտալիայից հետո):
Վերջին տվյալների համաձայն ՝ աշխարհում վարակվել է ավելի քան 785 797 մարդ, 37 816-ը՝ մահվան ելքով, ապաքինվել է 165 607-ը։