Ժամանակի ընթացքում ավելի է անլրջանում «100 փաստի» բովանդակությունը.Դատարկ թղթից խուսափելու ճանապարհը․ «Փաստ»
ՎԵՐԼՈՒԾԱԿԱՆ«Փաստ» օրաթերթը գրում է
Վերջին ասուլիսին վարչապետ Նիկոլ Փաշինյանը ներկայացրեց իր՝ ավանդական դարձած «100 փաստը»։ Ակնկալվում էր, որ այս անգամ Փաշինյանի ներկայացրած փաստերը պետք է լինեին ծանրակշիռ, քանի որ, ըստ էության, ակնկալվում էր, թե վերջինս դրանով պետք է ամփոփեր իր պաշտոնավարման երկու տարվա արդյունքները։ Սակայն ներկայացված փաստերը բովանդակային առումով շատ թույլ էին և կառավարության գործունեության արդյունավետության տեսանկյունից ոչ համոզիչ։
«100 փաստում» բերված էին կետեր, որոնք ո՛չ ուղղակի, ո՛չ անուղղակի կապ չունեին կառավարության աշխատանքի հետ, կամ եթե կապ ունեին, ապա դրանց կարևորությունը հանրության համար շատ ցածր է։
Օրինակ՝ վարչապետը կովկասյան ընձառյուծի՝ Տավուշի մարզում հայտնվելը ներկայացնում է որպես իր կառավարության ձեռքբերում։
Սակայն նշենք, որ վայրի բնության հիմնադրամի՝ WWF-ի փորձագետները Տավուշում հայտնված ընձառյուծի նախշերը համեմատել են վերջին տարիներին Հայաստանում լուսանկարված մյուս ընձառյուծների հետ և պարզել, որ նույն կենդանին նկարվել է նաև FPWC-ի տեսախցիկներով 20182019 թվականներին Արարատի և Վայոց ձորի մարզերում:
Ենթադրաբար կենդանին 2019-ի աշնանը, հատելով երկրի կեսը, հարավային Հայաստանից եկել հասել է Իջևանի լեռներ։ Սակայն կառավարությունն ինչ քայլեր է կատարել, որ ընձառյուծը հայտնվի Իջևանի անտառներում, մնում է հարցական։ Եվ պատահական չէ, որ ընձառյուծի հայտնվելու թեման համացանցում ծաղրանքի առարկա դարձավ։
Իսկ եթե Փաշինյանը փորձում է ցույց տալ, թե իր կառավարման ընթացքում բարելավվել է Հայաստանի տարածքների էկոհամակարգը, ապա դրա համար ընձառյուծի հայտնվելը ցուցիչ չէ։
Էկոհամակարգի բարելավման տեսնկյունից կարելի էր բերել լուրջ հետազոտության արդյունքներ, թե, օրինակ՝ ինչ չափով են ավելացել կանաչապատ տարածները, ինչքանով է նվազել օդի աղտոտման մակարդակը և այլն։
Իհարկե, վարչապետը կարող էր գոնե մի քիչ լուրջ փաստարկներ ներկայացնել, որոնք ավելի տպավորիչ կլինեին, բայց վերջինս կարծես թե չի ցանկացել ժամանակ կորցնել, որպեսզի գոնե մի քիչ խորանա փաստերի մեջ, այլ ուղղակի վերցրել է տարբեր փաստերի համախումբ՝ մտածելով, թե այս անգամ էլ հնարավոր կլինի բնակչությանը համոզել, թե երկրում իրական փոփոխություններ են կատարվում։
Եվ տպավորություն է առաջանում, թե Փաշինյանն ուղղակի անլրջությամբ է մոտենում հանրությանը հաշվետու լինելու խնդրին։ Օրինակ՝ վերջինս վարչապետի կնոջ տուգանվելու փաստը նույնպես ներառել է 100 փաստի շրջանակներում, որպեսզի իբր ցույց տա, թե Հայաստանում հաստատվել է իրավունքի գերակայություն, և բոլորը հավասար են օրենքի առաջ, այդ թվում՝ վարչապետի կինը։
Սակայն մարդիկ շատ լավ պատկերացնում են, որ վարչապետի կնոջը տուգանելու փաստը հանրայնացնելն ուղղակի շոու է և ցուցադրականություն, քանի որ մենք տեսնում ենք, թե ինչ ճնշումների է ենթարկվում դատական համակարգը, ինչպես են գործեր կարվում ընդդիմադիրների նկատմամբ նրանց լռեցնելու համար և այլն։
Դե, բենզինի գնի նվազման մասին կետի մասին խոսելն ինքնին անիմաստ է դառնում. դա երևի թե ամենատարօրինակ արձանագրումներից մեկն էր: Ու պատահական չէ քաղտեխնոլոգներից մեկի գրառումը.
«Ճիշտն ասած՝ ես չգիտեի, որ Նիկոլը կարողանում է կառավարել նավթի համաշխարհային գները: Փաստորեն, ԲիՓին, Ռոսնեֆտը, Ռոտշիլդները, արաբական աշխարհը Ո՞ՒՄ ՇՈՒՆՆ ԵՆ»: Սա կարելի է համարել սոցցանցերում այս ասուլիսին նվիրված հեգնական գնահատականների հավաքական գրառումը:
Ի դեպ, նախկինում վարչապետի ներկայացրած փաստերն ավելի ծանրակշիռ էին, քան այս անգամ, և պատահական չէ, որ դատելով համացանցում արվող մեկնաբանություններից՝ հանրությունը ժամանակի ընթացքում գնալով ավելի անլուրջ է վերաբերվում «նոր Հայաստանի» մասին 100 փաստերի հերթական խմբաքանակին։
Միգուցե ժամանակն է, որ կառավարությունը հրաժարվի «100 փաստի» ձևաչափից, և եթե 100 խոշոր ձեռքբերումներ չկան, ապա հանրությանը ներկայացվեն այն քանակությամբ փաստեր, որքան դրանք կան, այլ ոչ թե «պտիչկա դնելու» համար ներկայացվի 100 փաստ, որոնց մեջ լինեն արհեստականորեն ներառված և կառավարության գործունեության հետ կապ չունեցող տվյալներ ու փաստեր։
Թեպետ, հասկանում ենք, որ այդ դեպքում գուցե վարչապետը ստիպված լինի հանրությանը ներկայացնել դատարկ սպիտակ թուղթ...
Մանրամասները՝ «Փաստ» օրաթերթի այսօրվա համարում