Կոչ են անում առավել կոշտ լինել
ՔԱՂԱՔԱԿԱՆ«Փաստ» թերթն իր նախորդ հրապարակումներում անդրադարձել է, որ ՀՀ-ում արևմտյան ֆինանսական աղբյուրներից օգտվող ՀԿ-ներն ու առանձին անհատներ, կամ, այլ ձևակերպմամբ՝ «սորոսական» բլոկը առանձնահատուկ ակտիվ է ՀՀ դատաիրավական ոլորտում ընթացող գործընթացների հարցում, որտեղ փորձում են հնարավոր տարբերակներով իրենց դերակատարությունն ունենալ։
Ավելին, այսպես կոչված, «սորոսականներն» իրենց մտահոգությունն էին հայտնել ՀՀ իշխանությունների կողմից վեթթինգից հրաժարվելու գաղափարի հետ կապված, իսկ օրերս ՍԴ շուրջ ընթացող գործընթացների և ընդհանուր դատաիրավական համակարգում ընթացող գործողությունների վերաբերյալ հայտարարությամբ էին հանդես եկել՝ ողջունելով ՀՀ իշխող քաղաքական մեծամասնության նախաձեռնությունը, որը քաղաքական ու իրավական հանրության մեծամասնությունն արդեն որակել է ակնհայտ հակասահմանադրական:
Թերթի տեղեկություններով, այս շերտի «հետաքրքրությունների» շրջանակը այսքանով չի սահմանափակվում. մեր աղբյուրների փոխանցմամբ, մասնավորաբար, երկու օր առաջ այս հատվածի ներկայացուցիչները իշխանության վերնախավի հետ հանդիպման ընթացքում հորդորել են իրենց քաղաքական գործիքակազմում արմատական փոփոխություններ իրականացնել և ավելի կոշտ ու չոր մեթոդներ կիրառել ընդդիմության նկատմամբ։
Նրանք փաստել են, որ իշխանության գործողությունները բավական թույլ են և ոչ առարկայական, նաև կոչ են արել ավելի ջանասիրաբար շարունակել «հեղափոխությունը» քաղաքական համակարգում և չդավաճանել իրենց որդեգրած սկզբունքներին: