ՌԴ ՊՆ-ն նոր հաղորդագրություն է տարածել
ՄԻՋԱԶԳԱՅԻՆՈւկրաինայում ՆԱՏՕ-ի ուժերի ներգրավմամբ Sea Breeze խոշոր զորավարժությունների քողի ներքո պլանավորվում է այդ երկրի տարածք մտցնել ժամանակակից սպառազինության խմբաքանակ։ Այս մասին հայտնել է ՌԴ ՊՆ պաշտոնական ներկայացուցիչ Իգոր Կոնաշենկովը։
«Զորավարժությունների անցկացման քողի տակ ծրագրվում է ժամանակակից սպառազինություն, զինամթերք և նյութական գույք հասցնել ուկրաինական զորքերին։ Հետագայում, ինչպես և նախորդ տարիներին, այդ ամենը փոխանցվելու է Դոնեցկի և Լուգանսկի շրջանների հարևանությամբ տեղակայված ուկրաինական զորքերին և ազգայնական կազմավորումներին»,- ասել է Կոնաշենկովը։
Նրա խոսքով՝ Ռուսաստանի Պաշտպանության նախարարությունը «պլանավորում է ուշիուշով հետևել զորավարժությունների նախապատրաստման և անցկացման ընթացքին, ինչպես նաև անհրաժեշտության դեպքում արձագանքել՝ ի շահ ՌԴ-ի ռազմական անվտանգության ապահովման»:
Sea Breeze բազմազգ ռազմածովային վարժանքներն Ուկրաինայում անցկացվում են 1997 թվականից՝ «Ուկրաինայի և ԱՄՆ-ի միջև պաշտպանության և ռազմական հարաբերությունների շուրջ փոխըմբռնման և համագործակցության մասին» հուշագրի շրջանակներում: Ընթացիկ տարում զորավարժությունները կանցկացվեն հունիսի 28-ից հուլիսի 10-ը: Դրանց կմասնակցեն Ուկրաինայի, ԱՄՆ-ի, Կանադայի, Մեծ Բրիտանիայի, Նիդերլանդների, Ռումինիայի, Բուլղարիայի, Հունաստանի, Թուրքիայի և Լատվիայի շուրջ 4 հազար զինվորական: Զորավարժություններին կմասնակցի 40 մարտական նավ, մոտորանավակներ և օժանդակ նավեր, 30 միավոր ավիացիոն տեխնիկա և ավելի քան 100 միավոր ավտոմեքենա և զրահատեխնիկա։