Պորտուգալական կանաչ գինի. իսկ ինչո՞ւ է այն կանաչ. «Փաստ»
ՀԱՆՐԱՀԱՅՏ ՄՈԼՈՐՈՒԹՅՈՒՆՆԵՐ«Փաստ» օրաթերթը գրում է
Չնայած այն հանգամանքին, որ ներկայումս Պորտուգալիայի Vinho Verde տարածաշրջանի գինիների մեծ մասը շշալցվում է կանաչավուն շշերի մեջ, այդ ըմպելիքն իր անունը ստացել է ոչ թե իր գույնի համար, որը կարող է լինել նաև դեղին, վարդագույն և նույնիսկ կարմիր, այլ կարճատև հնեցման: Այսինքն՝ այդ գինին երիտասարդ է՝ կանաչ։ Vinho Verde-ն շատ հին գինեգործական շրջան է, որը ներառում է Պորտուգալիայի հյուսիս-արևմուտքում գտնվող երկու նահանգ՝ Մինուն և Դուրո Լիտորալը: Այդ տարածքները գինեգործության համար ունեն տեղումների բավականին բարձր մակարդակ, ուստի հասունացած խաղողը թթվաշ է լինում, իսկ դրանից ստացված գինին բավականին յուրահատուկ է ստացվում, այն կարծես չհասած խաղողից պատրաստված լինի։
Նման գի նու մեջ կա նաև որո շ ա կ ի «փրփրայնություն», ինչպես շամպայնի մեջ, ինչը նույնպես բարձր է գնահատվում գիտակների կողմից։ Ինչպես արդեն նշվեց, պորտուգալական կանաչ գինու՝ Vigno Verde-ի գույնը կարող է տարբեր լինել՝ սկսած գրեթե սպիտակից և ծղոտագույնից մինչև վարդագույն և մուգ կարմիր: Vinho Verde-ի պատմությունն սկսվել է այնքան վաղուց, որ հնարավոր չէ ճշգրիտ ժամկետներ նշել, բայց հայտնի է, որ այդ վայրերից գինին առաջին անգամ հիշատակվել է մ.թ.ա 1-ին դարում ապրած հռոմեացի փիլիսոփա Սենեկայի գրվածքներում:
Հռոմի անկումից հետո վանականներն են Պորտուգալիայում, ինչպես և Եվրոպայի այլ վայրերում զբաղվել խաղողագործությամբ, իսկ ահա գյուղացիներն իրենց ամբողջ ցանքատարածքներն օգտագործել են այլ մշակաբույսերի համար՝ խաղողի որթ աճեցնելով միայն ցանկապատերին ու տներին հյուսված: Նման որթատունկը շատ պտղաբեր է եղել, բայց խաղողի համն ու նրանից ստացված գինու համը այն չի եղել։ Ուստի և նման խաղողից ստացված գինին երկար ժամանակ մնացել է սոսկ գյուղացիական, ընդ որում՝ գյուղացիները հաճախ տանը միայն գինի ու հաց են ունեցել, որն էլ կերել են՝ թաթախելով գինու մեջ։ Ի դեպ, այս յուրահատուկ ուտեստը կոչվում է Sopas de cavalo cansado, որը բառացի նշանակում է «Հոգնած ձիու ապուր»։
Կարելի է ասել, որ 1172 թվականին Պորտուգալիայի իշխանությունների ընդունած հարկային արտոնություններն են հիմք հանդիսացել կոմերցիոն գինեգործության ստեղծման համար։ Պորտուգալիայի առաջին թագավոր Աֆոնսո Հենրիկեսը հրաման է արձակել, որով բոլոր խաղող աճեցնողներին 5 տարի ժամկետով ազատել է հարկերից։ Գյուղացիներն սկսել են լավ հողակտորներ հատկացնել խաղողի համար, կատարել սելեկցիա, և շատերի համար գինեգործությունը կողմնակի եկամուտ ստանալուց վերածվել է հիմնական գործունեության։
Ներկայումս Vinho Verde-ի համար հատկացված է շուրջ 21000 հեկտար տարածք, և այդ տարածքը խիստ սահմաններ ունի։ Պորտուգալական կանաչ գինի կոչվելու իրավունք ունի միայն այդ վայրերում արտադրված խմիչքը։ Այնտեղ գինու արտադրության տեխնոլոգիան մշակված է ամենափոքր մանրամասնությամբ։ Որթատունկերը կապվում են հատուկ ձևով, որպեսզի խաղողի ողկույզները լինեն տերևների տակ, քիչ արև տեսնեն և քիչ շաքար հավաքեն։ Բացի դա, գյուղացիները նաև բերքը հավաքում են՝ չսպասելով խաղողի ամբողջական հասունացմանը։ Արդյունքում ստացվում է յուրահատուկ, բայց հաճելի և հեշտությամբ ճանաչելի թարմ պորտուգալական կանաչ գինի։
Մանրամասները՝ «Փաստ» օրաթերթի այսօրվա համարում