Կրակոցներ՝ Երևանում. հիվանդանոց տեղափոխված տղամարդը մահացել է

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Այսօր՝ մայիսի 5-ին, կրակոցներ են հնչել Երևանում, ինչի հետևանքով մեկ մարդ մահացել է։ Ինչպես հայտնում է Past.am-ը՝ հղում անելով օպերատիվ տվյալներին, ժամը 13:30-ի սահմաններում ՀՀ ՆԳՆ ոստիկանության քրեական ոստիկանության գլխավոր վարչության Երևանի քրեական վարչությունում և համայնքային ոստիկանության Շենգավիթի բաժնում տեղեկություններ են ստացվել, որ Բագրատունյաց փողոցի 13 հասցեում կրակոցներ են հնչել և կա տուժած։

Ըստ Shamshyan.com-ի տեղեկությունների՝ մինչ իրավապահների ժամանումը, դեպքի վայրից հրազենային վնասվածքով մի քաղաքացի տեղափոխվել է հիվանդանոց։ Ավելի ուշ բուժհաստատությունից ոստիկանության Շենգավիթի բաժին ահազանգ է ստացվել, որ վիրավորը, գիտակցության չգալով, մահացել է։

Դեպքի առթիվ Շենգավիթի քննչական բաժնում նախաձեռնվել է քրեական վարույթ՝ «սպանություն» հոդվածի հատկանիշներով։ Իրավապահները պարզում են կատարվածի հանգամանքները, մահացածի և կրակոցներ արձակած անձի ինքնությունը, ինչպես նաև ձեռնարկում են անհրաժեշտ միջոցառումներ՝ վերջինիս և հանցագործության գործիքը հայտնաբերելու ուղղությամբ։

Ինչպես նշում է Past.am-ը, դեպքի վայրում հայտնաբերվել են արնանման հետքեր, ծխախոտ և այլ կասկածելի իրեր, որոնք կարող են կարևոր նշանակություն ունենալ քննության համար։

Դեպքի վայրում հավաքված քաղաքացիներից մի քանիսը, ովքեր հրաժարվել են տեսախցիկի առաջ խոսել, նշել են, որ մահացածը մոտ 40 տարեկան տղամարդ է՝ Արտյոմ անունով։

Հետևեք մեզ՝ այստեղ