«“Լուսավոր Հայաստանը” իրական ընդդիմություն է և գործընկեր»

Տեղի է ունեցել «Լուսավոր Հայաստան», «Հանրապետություն», «Քաղաքացիական պայմանագիր» կուսակցությունների ներկայացուցիչների հանդիպումը, որի ընթացքում ձեռք են բերվել համագործակցության վերաբերյալ հստակ պայմանավորվածություններ: «Քաղաքացիական պայմանագիր» կուսակցության մամուլի խոսնակ Ռուբեն Ռուբինյանը Past.am-ի հետ զրույցում խոսեց այս կուսակցությունների դիրքորոշումների և հետագա համագործակցության մասին:

 

– Ի՞նչ բնույթ է կրելու ձեր համագործակցությունը և ի՞նչ կտա այն կոնկրետ ՔՊ–ին:

 

– Համագործակցության հետ կապված բոլոր մանրամասները կիմանաք դեկտեմբերի 12–ին՝ համատեղ հայտարարությամբ։

 

 

– «Քաղաքացիական պայմանագրի» և «Լուսավոր Հայաստանի» միջև շատ կարևոր հարցի շուրջ տարաձայնություն կար: Խոսքը Սերժ Սարգսյանին իմպիչմենտ հայտնել–չհայտնելու մասին է: Լուծվե՞լ է տարաձայնությունը, թե ՔՊ–ն է փոխել իր մոտեցումները: Ի՞նչ հայտարարի եք եկել այս սկզբունքային հարցի շուրջ:

 

– ՔՊ–ն այն ժամանակ իմպիչմենտ ներկայացնելը որպես պայման էր դրել կոնկրետ գործողության՝ Վանաձորում ինքնաբացարկ հայտնելու համար։ Իմպիչմենտ ներկայացնել–չներկայացնելը նշանակություն ուներ միայն այդ համատեքստում, և մեզ համար միջոց էր ԼՀ–ի դիրքորոշումը ճշտելու և որոշակի երաշխիքներ ստանալու համար։ Այժմ, եթե հայտարարվել է համագործակցության վերաբերյալ հստակ համաձայնություն, նշանակում է, որ ՔՊ–ն և ԼՀ–ն համաձայնության են եկել բոլոր սկզբունքային հարցերի շուրջ։

 

 

– Դուք Վանաձորի ընտրությունների ժամանակ առաջարկում էիք, որ «Լուսավոր Հայաստանի» քաղաքական ղեկավարությունը հայտարարի, որ պահանջում է Սերժ Սարգսյանի հրաժարականը, որպեսզի միավորվեն: Հիմա ինչն է փոխվել:

 

– Նշյալ առաջարկն արվել է Վանաձորի ընտրությունների համատեքստում։ Դրա նպատակը երկու ուժերի հնարավոր մեկտեղումն էր, ինչի համար, սակայն, ՔՊ–ին անհրաժեշտ էր ճշտել ԼՀ–ի դիրքորոշումն ու նպատակները։ Այն ժամանակ, ցավոք, համագործակցություն տեղի չունեցավ։ Այժմ փոխվել է այն, որ ՔՊ–ն և ԼՀ–ն որոշակի ըմբռնման են հասել և դիրքորոշումների մերձեցում է տեղի ունեցել։

 

– Սրանից հետևո՞ւմ է, որ «Քաղաքացիական պայմանագրի» և «Լուսավոր Հայաստանի» դիրքորոշումներն ու նպատակները, գուցեև ձեր առջև դրված խնդիրների լուծման ուղիները մեկտեղվում են:

 

– Սրանից հետևում է, որ ՔՊ–ն և ԼՀ–ն, ինչպես նաև «Հանրապետությունը» համաձայնության են եկել իրենց դիրքորոշումների, սկզբունքային հարցերի և հետագա համագործակցության վերաբերյալ, որի մանրամասները կհայտնվեն դեկտեմբերի 12–ին։

 

– «Լուսավոր Հայաստանը» ՔՊ վարչության կազմի համար այսօր հանդիսանու՞մ է իրական ընդդիմություն: Չէ որ Էդմոն Մարուքյանի՝ ԱԺ–ում որոշ սկզբունքային հարցերին կողմ կամ դեմ քվեարկելու հետ կապված Նիկոլ Փաշինյանը ակնարկել էր, թե իբր Էդմոն Մարուքյանը իր քվեարկություններով որոշակի իշխանական պահվածք է դրսևորել:

 

– Այո, մեզ համար խնդիր է եղել Պարոն Մարուքյանի՝ կառավարության կազմին և բյուջեներին կողմ քվեարկելը։ Սակայն, եթե հաշվի ենք առնում «կողմ» քվեարկելը, պիտի հաշվի առնենք նաև «դեմ» քվեարկելը, և, պիտի ուրախությամբ նշեմ, որ պարոն Մարուքյանը նոր կառավարությանը դեմ է քվեարկել։ Բացի այս, Վանաձորյան ընտրություններին հաջորդած շրջանում ԼՀ–ն, մեր տեսանկյունից ցուցաբերել է ընդդիմադիր պահվածք։ Ըստ այդմ՝ այո, ԼՀ–ին մենք դիտարկում ենք որպես իրական ընդդիմություն և իրական գործընկեր։

 

ՔՐԻՍՏԻՆԱ ՏԵՐ–ՄԱԹԵՎՈՍՅԱՆ

 

Կիսվել