Հոր տղեն է
ՎԵՐԼՈՒԾԱԿԱՆՆախօրեին համացանցը ողողվել էր տեղեկություններով, համաձայն որի, Արման Սահակյանը հունից հանել է վարչապետ Կարեն Կարապետյանին։ Մեր մեջ ասած, վարչապետը վերջերս շատ է հունից դուրս գալիս։ Ասում եմ, այդ «սիմպատիչնի» անձնավորությանը մի բան չպատահի՞, ազգովի մնանք անհույս։ Մյուս կողմից էլ, մեկը չկա՞ վարչապետին հուշի, որ այ ախպեր ջան, ընտրությունները պրծել են, դու արդեն հանգիստ քո գործին նայի ու հունից դուրս մի արի։
Բայց այս պատմության մեջ, հետաքրքրական է հունից հանողի անձը։ Այո, այո, նա հենց Գալուստ Իմաստասերի որդին է՝ Արման Սահակյանը։ Բայց վարչապետի հունից դուրս գալը չեմ հասկանում անկեղծ ասած։ Արման Սահակյանը ո՞ր մեկն անի, ձայներ բերի ու ՀՀԿ-ին խորհրդարան անցկացնի, թե իր գործառույթները կատարի որպես պաշտոնյա։ Մի քիչ խիղճ ունեցեք մարդու նկատմամբ։ Նոր են ընտրություններն ավարտվել, դուք էլ ՝ գործ հա գործ։ Բայց մյուս կողմից էլ, վարչապետին տեղն է, դե թող մեր վիճակն իմանա, թե ինչ օրի էինք վերջին հինգ տարիների ընթացքում, երբ սահմանադրորեն երկրորդ դեմքը, ամեն անգամ փորձում էր իրերին իր սեփական բնութագրումը տալ։
Կարինե Մինասյան, Armenia24.info