Քանի որ հայկական կինոարտադրության մեջ շատ չեն բաց տեսարաններ նկարահանելու փորձերը, այդ կուլտուրան դեռևս հստակ չէ այս ասպարեզում. Էվա Խաչատրյան
ԼԱՅՖ«Դեպի վայրէջք» 25 մասանի ֆիլմը «Արմենիա պրեմիումի» եթերում կլինի հունիսի 26-ից, սակայն այն արդեն հասցրել է շատերի ուշադրությունը գրավել: Հեռուստասերիալը անդրադառնալու է կարեւոր եւ հետաքրքրող թեմայի՝ թրաֆիքինգի, ինչն արդեն ենթադրում է, որ ֆիլմը հարուստ է լինելու բաց տեսարաններով:
«Դեպի վայրէջք» հեռուստասերիալը զարգանալու է Էմմա Մանուկյանի, Սարգիս Գրիգորյանի, Էվա Խաչատրյանի, Ալեքսանդր Բաբասյանի, Մերի Հակոբյանի եւ այլ դերասանների շուրջ, որոնց մասնակցությամբ հեռուստասերիալի անոնսն արդեն իսկ մեծ հետաքրքրություն է առաջացրել:
Life.panoramal.am-ը «Դեպի վայրէջք» բազմասերիանոց ֆիլմի մասին զրուցել է դերասանուհի Էվա Խաչատրյանի հետ: Նա մարմնավորում է բորտուղեկցորդուհու, ով սիրահարված է օդաչուին՝ Սարգիս Գրիգորյանի հերոսին: Վերջինս ամուսնացած է նրա ընկերուհու հետ, բայց Էվայի հերոսհու՝ Վիկայի հետ նույնպես սիրային հարաբերությունների մեջ է: Դերասանուհու խոսքով՝ իր հերոսուհին բացասական կերպար չէ, պարզապես նրա կյանքը ճիշտ ուղով չի ընթացել, հանգամանքներն էլ բերել են սխալ քայլերի:
«Այս նախագծում նկարահանվելու առաջարկը ստացել եմ Ելենա Արշակյանից, ու վստահ լինելով նրա պրոֆեսիանալիզմի վրա՝ անմիջապես ընդունել եմ: Նրա հետ աշխատելն ինձ հաճելի է եւ մասնագիտական, եւ մարդկային հարաբերությունների իմաստով: Առաջարկն ընդունելու հարցում ինձ համար մեծ նշանակություն ունեցավ նաեւ այն հանգամանքը, որ սցենարը գրելիս՝ իմ հերոսուհու համար հենց ինձ են պատկերացրել: Ուրախ եմ, որ այս նախագծի մասնակիցն եմ: Այն լինելով մի քանի մասանի հեռուստասերիալ՝ բավականին բարձր մակարդակով է իրականացվում, ինչը դերասանի համար շատ հաճելի է»,- պատմեց Էվա Խաչատրյանը:
Անդրադառնալով ֆիլմի բաց տեսարաններին, որոնցում հանդես է եկել նաեւ դերասանուհին, եւ հարցին, թե էվան պատրա՞ստ է լսել հասարակության կարծիքը, որոնք գուցե քննադատություններով ուղեկցվեն, պատասխանեց.
«Եթե ստեղծագործող դերասանուհի եմ, ուրեմն կարող եմ եւ ենթարկվել քննադատությունների: Ինձ դրանք չեն վախեցնում, հակառակ դեպքում կնշանակեր վախենալ նաեւ իմ մասնագիտությունից: Իմ ընտրած արվեստում եզրեր չկան, ինչպես լավ սպորտսմենը չպետք է վախենա հարվածից, այնպես էլ լավ դերասանը չպետք է վախենա իրեն առաջարկված դերերից, որոնք միգուցե չհաջողվեն ու արժանանան քննադատությունների: Հետեւաբար, որպես դերասանուհի, դերերս չեմ անջատում բաց կամ այլ տեսարաններց: Դրանք կերպարային գիծն է պահանջում եւ իրական Էվայի հետ ոչ մի կապ չունի»:
Էվա Խաչատրյանը շեշտեց՝ բաց տեսարնների հարցում միակ մտավախությունը էսթետիկ տեսարան ստանալն է, որպեսզի ճիշտ մատուցվի տվյալ իրավիճակը:
«Քանի որ հայկական կինոարտադրության մեջ շատ չեն բաց տեսարաններ նկարահանելու փորձերը, այդ կուլտուրան դեռեւս հստակ չէ այս ասպարեզում: Այդ իսկ պատճառով հնարավոր է, որ այդ տեսարանները թերություններ ունենան: Կոնկրետ իմ ու Սարգիսի մասնակցությամբ նման տեսարանները բավականին հաջող են ստացվել, քանի որ մասնագետների կողմից լավ արձագանքներ կան՝ անգամ կիսամոնտաժված տարբերակը դիտելիս: Ինձ համար հաճելի է, երբ լսեցի, որ գեղեցիկ ու էսթետիկ է ստացվել, հուսամ՝ հեռուստադիտողն էլ այն կհավանի, թեեւ կրկնում եմ՝ քննադատությունների սպասում եմ: Իսկ ընդհանուր առմամբ, ամենակարեւորը կերպարիս սյուժետային գիծը իր ճիշտ նպատակին հասցնելն էր, ինչը կարծես թե ստացվեց»,- ընդգծեց դերասանուհին:
Հեղինակ՝ Անուշիկ Մելքոնյան