Առ­կա վի­ճա­կի իրա­կան պատ­ճառ­նե­րը՝ «կոր­ծա­նիչ, քայ­քա­յիչ և ապա­պե­տա­կան»

Երեկ հերթական պրոֆեսիոնալն է լքել Նիկոլ Փաշինյանի թիմը: Երբ հայտնի դարձավ, որ աշխատանքից ազատվել է վարչապետի խորհրդական Հակոբ Ճաղարյանը, շատերը գուցե անակնկալի եկան, սակայն հանուն արդարության պետք է նշել, որ առանձնապես զարմանալու բան էլ չկար: 

Ավելին, կարծիքներ շրջանառվեցին, որ, ամենայն հավանականությամբ, ավիացիայի շուրջ տեղի ունեցող իրադարձությունների ֆոնին «քայլողների» նվագախմբային «կրուտիտներից» տարբերվող տեսակետն է դարձել Ճաղարյանի հրաժարականի պատճառը: Պարզվեց՝ նման կարծիք հայտնողները չէին սխալվել:

Մինչ լրագրողները փորձում էին կապ հաստատել վարչապետի նախկին խորհրդականի հետ, վերջինս Ֆեյսբուքի իր էջում գրառում կատարեց, որը այլ կերպ, քան սենսացիոն, դժվար է որակել: Ավիացիայի ոլորտի փորձառու մասնագետը, որն ամբողջությամբ տեղյակ է համակարգի բոլոր խնդիրներին ու նրբություններին, որպես իր աշխատանքից ազատվելու պատճառ նշել է «քաղաքացիական ավիացիայի հանդեպ ցուցաբերվող կործանիչ, քայքայիչ և ապապետական մոտեցումները»: «Նախորդ շաբաթ օրը` ապրիլի 4-ին ես վարչապետին գրել եմ իմ վերջին զեկույցը, որտեղ հերթական և վերջին անգամ բացատրել եմ` 

-հայկական քաղավիացիայի ԻՐԱԿԱՆ իրավիճակը, առանց ստերի և իրականության աղավաղման,

- հերթական անգամ պարզաբանել եմ այս վիճակում հայտնվելու իրական պատճառները,

- և նշել եմ այս ճգնաժամից դուրս գալու ուղիները:

Զեկույցում առաջարկել եմ թույլ տալ վերջապես գրագետ, կազմակերպված, և երկիրն ու ոլորտը սիրող, անվարձահատույց աշխատանքի պատրաստ, իրական մասնագետների թիմի հետ լծվել իրավիճակի շտկմանը:

Հակառակ դեպքում ընդունել իմ հրաժարականը»,-գրել է Հակոբ Ճաղարյանը:

Այսինքն, փաստացի, իշխանություններին պետք չի եղել շտկել իրավիճակը, ուստի ընդունել են մասնագետի հրաժարականը:

Չափազանց ուշագրավ է ևս մեկ ձևակերպում. «Ես հրաժարվում եմ տաքուկ տեղ գտած, անհաղորդ խորհուրդներով «խորհրդականի» անպիտան կարգավիճակից»: Այս խոսքերը փաստացի մատնանշում են այն իրական վիճակը, որը տիրում է Փաշինյանի իշխանության ներսում: Հասկանալի է, որ թիմն ամբողջությամբ հարձակվելու է նախկին օգնականի վրա, ի դեմս նրա գտնելու են հերթական «դավաճանին», բավարարեն նոր «սև» գտնելու իրենց անհագուրդ ցանկությունը: Սակայն մի կարևոր խնդիր ունեն «քայլողները». նույնիսկ լավագույն ցանկությամբ, Հակոբ Ճաղարյանին հնարավոր չէ որևէ կերպ կապել «նախկինների» հետ, լրիվ ընդհակառակը: Մնում են այլ «կրուտիտները», ինչն էլ փորձում են անել: Բայց սա հարցի միլիոներորդական մասն է: Ամենաէականը երկու կարևոր հանգամանք է:

Նախ՝ այն, որ քաղավիացիայում առկա են օրեցօր խորացող խնդիրներ, այն որ այս ոլորտը մի կրպակ չէ, որը վստահես անփորձ աղջկա, որը հանկարծ ու լքում է երկիրը՝ մնալով իր պաշտոնին, այն, որ փորձառու մասնագետները վերջին երկու տարում հեռանում էին համակարգից, նորություն չէ: 

Այս մասին գրվել է քանիցս, այդ թվում՝ մեր կողմից, այդ մասին բազմիսց բարձրաձայնել են ոլորտի մասնագետները: Սակայն, ինչպես բոլոր մյուս հարցերում, այս դեպքում էլ Փաշինյանն ու իր թիմը թքած են ունեցել մասնագետների, պրոֆեսիոնալների կարծիքի վրա և իրենց անսխալականության, ամենագետության սին համոզմունքի վրա հիմնվելով՝ հասել են այնպիսի կետի, որ ավիացիայի ոլորտի մասնագետը բոնորոշում է որպես կործանիչ, քայքայիչ և ապապետական: 

 

Երկրորդ. գաղտնիք չէ, որ Փաշինյանը չի հանդուրժում ինքնուրույն մարդկանց, ու նրա հավաքած թիմում չափազանց քիչ են ադեկվատ, պրոֆեսիոնալ, իսկապես իրենց գործի գիտակ ու սեփական կարծիք ունեցող մարդիկ: 

Ու հետաքրքիր է, որ այդ մարդկանց պարագայում ի սկզբանե շատերի մեջ տարակուսանք է եղել, թե ինչպես են կարողանում աշխատել քծնանքի, բացարձակ միակարծության, անձնիշխանության ու ինքնասիրահարվածության մթնոլորտում: Անցած երկու տարում նրանցից մի քանիսը հեռացան, ոմանք՝ աղմուկով, ոմանք՝ լուռ: Սա լավագույն բնորոշիչն է այն վիճակի, ինչն առկա է «քայլող» թիմում ու, ըստ այդմ, մեր երկրում:

Ու որ այս ամենը ուղղել անգամ հնարավոր չէ, վկայեց հենց միայն այն, որ փոխանակ եզրակացություններ անելու, վարչապետը երեկ մի տողանոց գրառումով ու հունվարյան իր մի ելույթի «շեյրով» նորից մեղքը բարդեց այլոց վրա:

Եվ դեռ կան մարդիկ, որոնք գտնում են, որ իշխանություններին քննադատելը գոնե այս պահին ճիշտ չէ: Նույնիսկ քննադատության պարագայում է այս վիճակը: Զարհուրելի է անգամ մտածել, թե ինչի մեջ կլինենք բոլորս, եթե քննադատության, ճիշտ և ուղիղ խոսքի ճանապարհն էլ փակվի:

ԱՐՍԵՆ ՍԱՀԱԿՅԱՆ