Թշնամուդ 5 մլրդ դոլարի զենք վաճառողը ինչպե՞ս կարող է անվտանգության երաշխավոր լինել

«Ժողովուրդ» թերթը գրում է. «Տարիներ շարունակ Հայաստանի իշխանությունները վստահեցնում են, որ Հավաքական անվտանգության պայմանագրին անդամակցությունը մեր պետության անվտանգության ապահովման համար է: 

ՀԱՊԿ պայմանագրի 2-րդ կետը սահմանում է. «Մեկ կամ մի քանի անդամ պետությունների անվտանգության, կայունության, տարածքային ամբողջականության եւ ինքնիշխանության սպառնալիքի ի հայտ գալու կամ միջազգային խաղաղության եւ անվտանգության սպառնալիքի դեպքում անդամ պետություններն անհապաղ գործի են դնում համատեղ խորհրդակցության մեխանիզմը իրենց դիրքորոշումները համակարգելու նպատակով, մշակում եւ անհրաժեշտ միջոցներ ձեռնարկում նման անդամ պետություններին օգնություն ցուցաբերելու համար սպառնալիքի վտանգի վերացման նպատակով»: Ինչպես հայտնի է, վերջին երկու շաբաթների ընթացքում Ադրբեջանը պարբերաբար հրետակոծում է Տավուշի մարզի սահմանամերձ գյուղերը: Հայաստանից բացի՝ ՀԱՊԿ անդամ են Ռուսաստանը, Բելառուսը, Ղազախստանը, Ղրղզստանը եւ Տաջիկստանը: Մինչ օրս ոչ ՀԱՊԿ-ն եւ ոչ էլ մյուս անդամ երկրները ծպտուն չեն հանել Հայաստանի տարածքը հրետակոծելու առնչությամբ:

Այսպիսով, հերթական անգամ մենք համոզվում ենք, որ ոչ ՀԱՊկ-ն, ոչ էլ դրա անդամները ոչ միայն մեր անվտանգության երաշխավորը չեն, այլեւ նույնիսկ հենց նրանք կարող են հիմնական սպառնալիքը լինել: Մի երկիր, որը իրեն դաշնակից է հռչակում, իսկ հաջորդ քայլին 5 մլրդ դոլարի զենք վաճառում թշնամուդ, ինչպե՞ս կարող է անվտանգության երաշխավորը լինել»:

Առավել մանրամասն՝ թերթի այսօրվա համարում