Դատական համակարգն ինչպես կախված է եղել գործադիրից և օլիգարխիայից, այդպես էլ մնալու է. Տիգրան Աթանեսյանը՝ սահմանադրական փոփոխությունների մասին

Այսօր Ազգային ժողովն ավարտեց սահմանադրական փոփոխությունների նախագծի քննարկումը: Արդեն հստակ է, որ ՀՀԿ-ն, ԲՀԿ և ՀՅԴ-ն կողմ են քվեարկելու այս նախագծին:

Իրենց ընդդիմադիր հռչակած որոշ ուժեր էլ դեռ շարունակում են ֆոտոսեսիաներ իրականացնել Բաղրամյան 26-ում՝ հիասթափություն առաջացնելով ընտրողների և լայն հասարակության շրջանում:

ՀՀԿ-ական պատգամավորներն էլ իրենց ելույթներով մատնում են այս փոփոխություննեևրի իրական նպատակը՝ իշխանությունների վերարտադրումը: Այդ իմաստով առավել ցայտուն էր Մարգարիտ Եսայանի բոցաշունչ ելույթը, որում վերջինս ձևականություն չի անում և հաստատում է այդ նպատակը:

Այն, որ իրավական և բովանդակային քննարկումերը զուտ ձևականություն են, երևում է շատ հստակ: Այս ամենը վերահաստատեցին մեզ հետ զրուցած բազմաթիվ իրավաբաններ:

Փաստաբան Տիգրան Աթանեսյանը Past.am-հետ զրույցում նշեց. «Ես խիստ դեմ եմ այդ փոփոխություններին՝ անկախ բովանդակությունից, որովհետև մեր երկրում չկա նման պահանջ»: Անդրադառնալով դատական համակարգի հնարավոր բարեփոխումներին՝ Աթանեսյանն ասաց, որ այն ինչպես եղել է գործադիրից և օլիգարխիայից կախված, այնպես էլ մնալու է:

«1936-ին ստալինյան սահմանադրությունը ամենաժողովրդավարականն էր, բայց դա չխանգարեց կոտորել միլիոնավոր մարդկանց: Սա էլ միայն քաղաքական քայլ է՝ ուղղված քաղաքական վերարտադրմանը, իսկ մնացած իրավական կարգավորումները փոշի են մեր ժողովրդի աչքերին»,- ասաց վերջինս:

Լևոն Փանոսյան