Իշխանական ճամբարում էլ կարող են լինել մարդիկ, ովքեր դեմ կլինեն նոր Սահմանադրությանը, բայց բացահայտ արտահայտվելու համարձակություն չունեն. Արմեն Աղայան

Հայտնի է, որ իշխանությունները պատրաստվում են մինչև այս տարեվերջ անցկացնել սահմանադրական հանրաքվե: Ի հակադրություն դրա՝ ընդդիմադիր ուժերը ստեղծել են «Ո´չ»-ի ճակատ, որը փորձում է թույլ չտալ սահմանադրական փոփոխությունների անցկացումը:

Past.am-ը զրուցել է «Հայազն» կուսակցության անդամ Արմեն Աղայանի հետ` Ճակատի գործունեության հետ կապված:

- Ի՞նչ տպավորություն ստացաք Գյումրիում կայացած «Ո´չ»-ի ճակատի հանրահավաքից, որն ավարտվեց քիչ առաջ:

- Գյումրիի հավաքին անձամբ ներկա չեմ եղել: «Հայազնը» դրա կազմակերպմանը չի մասնակցել: «Ո´չ»-ի ճակատ կոչվածը քաղաքական դաշինք չէ և դրա անդամները ինքնուրույն են գործում կամ խումբ առ խումբ: Օրինակ` մենք մեր ասելիքն ասեցինք սեպտեմբերի 21-ի Ինքնիշխանության երթի ժամանակ: Գյումրիից հեռակա մի քանի հատված եմ դիտել միայն: Այնպիսի տպավորություն ստացա, թե հին ընդդիմության ներկայացուցիչները Սերժ Սարգսյանի նախագծի դեմ պայքարելուց բացի, կարծես ժամանակից շուտ նախընտրական արշավ էլ են սկսել` նախկինում չարդարացրած իրենց ոճով:Իհարկե, իրավունք ունեն:

Սպասելի էր նաև, որ հարթակից կհնչեն մեզ համար գաղափարական իմաստով անընդունելի արտահայտություններ՝ թե´ գործող սահմանադրությունը գովելու պահով, թե´ այլ հարցերով: Մի քանի անգամ առիթ եմ ունեցել ասելու, որ իրականում գործ ունենք սահմանադրության նախագծի դեմ հանդես եկող մի քանի ճակատների հետ` մեկը, ով ուզում է օգտագործել առիթը ժողովրդին փողոց հանելու համար, մյուսը փորձում է փրկել նախագահական համակարգը, իսկ մենք դեմ ենք հանդես գալիս այսօր էլ առկա միաբևեռ համակարգի հավերժացմանը միաբևեռ կուսակցապետության տեսքով: Սակայն, այս մոտեցումներից անկախ, գոյություն ունի Սերժ Սարգսյանից ու ՀՀԿ-ից հոգնած ժողովուրդը, որին ևս մեկ անգամ առիթ են տալիս հայտնելու իր անվստահությունը իշխող վերնախավին:

-Այսօր ՀՅԴ խմբակցության պատգամավոր Արծվիկ Մինասյանն ասաց, թե սահմանադրական հանրաքվեի ժամանակ կեղծիքներ սպասենք միայն «Ո´չ»-ի ճակատից: Ինչպե՞ս կմեկնաբանեք այդ հայտարարությունը:

-Արծվիկի ասածն առաջին հայացքից անհեթեթություն է: Չեմ կարծում, թե «Ո´չ»-ի բացահայտ կողմնակիցները, անգամ ցանկության դեպքում, որևէ հնարավորություն կունենան կեղծելու քվեարկությունը: Հավանաբար, նա նկատի ունի «Ո´չ»-ի թաքնված կողմնակիցներին: Չէ՞ որ իշխանական ճամբարում էլ կարող են լինել մարդիկ, ովքեր դեմ կլինեն նոր Սահմանադրությանը, բայց բացահայտ արտահայտվելու համարձակություն չունեն: Գուցե իր հարազատ մեծամասնականը կորցնող ինչ-որ օլիգարխ կամ նախագահ դառնալ երազող ՀՀԿ-ական պարագլուխ այնքան էլ ուրախ չէ, որ Սերժ Սարգսյանը զրկում է նրանց այդ հնարավորությունից:

Լևոն Փանոսյան