Հոքինգի 10 մտքերը, որոնք բացահայտում են հանճարի կյանքի փիլիսոփայությունը

Սթիվեն Հոքինգը 21 տարեկան էր, երբ նրա մոտ հայտնաբերվեց շարժողային նեյրոնների խանգարում։ Այն ժամանակ բժիշկները նրա համար ընդամենը մի քանի տարվա կյանք կանխատեսեցին։

Այժմ նա  72 տարեկան է և ժամանակակից աշխարհի առաջատար ֆիզիկոսներից մեկը, Քեմբրիջի համալսարանի պրոֆեսոր, սև խոռոչների հետազոտող և «Ժամանակի կրճատ պատմությունը» գրքի հեղինակ։

Ահա 10 մտքեր Հոքինգից գիտության ու կյանքի մասին։

Հաշմանդամության մասին

Իմ խորհուրդը մյուս հաշմանդամ մարդկանց հետևյալն է. կենտոնացեք այն ամենի վրա, ինչը Ձեր հաշմանդամությունը չի սահմանափակում անել, և մի ափսոսացեք այն ամենի համար, ինչն անընդունակ եք անել։ Հաշմանդամ մի եղեք ո՛չ ոգով, ո՛չ էլ ֆիզիկապես։

Առաջնահերթությունների մասին

Իմ նպատակը պարզ է. տիեզերքի ամբողջական ճանաչողությունը. ինչու է այն այնպիսին, ինչպիսին կա, և ինչու այն գոյություն ունի առհասարակ։

Ազատ կամքի մասին

Ես նկատել եմ, որ նույնիսկ այն մարդիկ, ովքեր պնդում են, թե ամեն ինչ նախասահմանված է, և որ մենք ոչինչ անել չենք կարող այդ ամենը փոխելու համար, փողոցն անցնելուց առաջ նայում են իրենց կողքերը։

Հումորի մասին

Կյանքը ողբերգություն կլիներ, եթե այն զվարճալի չլիներ։

Իր IQ-ի մասին

Ես գաղափար չունեմ, թե որքան է իմ IQ-ն։ Նրանք, ովքեր պարծենում են իրենց IQ-ով, ձախողակներ են։

Ինչի մասին է նա մտածում ողջ օրը

Կանանց. նրանք իսկական առեղծվածներ են։

Նրա խորհուրդն իր երեք զավակներին

Առաջինը՝ հիշեք վերև նայել՝ աստղերին ու ոչ թե ներքև՝ Ձեր ոտքերին։ Երկրորդը՝ երբեք մի հրաժարվեք աշխատանքից։ Աշխատանքն իմաստ ու նպատակ է տալիս, և կյանքը դատարկ է առանց դրա։ Երրորդ՝ եթե դու բավականաչափ հաջողակ ես ու սեր ես գտել, հիշիր, թե որտեղ է այն և երբեք դեն մի՛ նետիր։

Կատարելության մասին

Տիեզերքի հիմնական կանոններից մեկն այն է, որ ոչինչ կատարյալ չէ։ Կատարելություն գոյություն չունի։ Առանց անկատարության ո՛չ ես, ո՛չ դուք գոյություն չէիք ունեն։

Խելքի մասին

Խելքը փոփոխություններին հարմարվելու կարողությունն է։

Բանիմացության մասին

Բանիմացության ամենամեծ թշնամին ոչ թե տգիտությունն է, այլ գիտելիքների պատրանքը։