Ավրաամ Ռուսո. «Որպես էթնիկ հայ` ես մեծացել եմ հայկական երաժշտության ներքո».Էքսկլյուզիվ հարցազրույց

Ռուսական շոու-բիզնեսի` հայկական արմատներ ունեցող աստղ Ավրաամ Ռուսոն շուտով հանդիսատեսի դատին կհանձնի իր առաջին հայալեզու ալբոմը: Ձայնասկավառակում տեղ գտած երգերից մեկը կոչվում է «Սարերի ջեյրան աղջիկ»: Այն արդեն հասանելի է համացանցում: Ի դեպ, տվյալ երգի հիման վրա երգիչը պատրաստվում է նկարահանել տեսահոլովակ: Այս և այլ թեմաների շուրջ NEWS.am STYLE-ը բացառիկ հարցազրույց է ունեցել Ավրաամ Ռուսոյի հետ, որն էլ ներկայացնում ենք ձեր դատին: 

- Ավրաա՛մ, ինչպես արդեն հայտնի է` Ձեր նոր ձայնասկավառակը բաղկացած է լինելու, բացառապես, հայկական  կատարումներից: Ինչպե՞ս որոշեցիք ստեղծել հայալեզու ալբոմ:

-Այս ձայնասկավառակը պատրաստվում էի թողարկել, դեռևս, 2008 թ-ին, պարզապես, հարմար գործընկեր էի փնտրում: Ալբոմը նախատեսված է աշխարհի տարբեր վայրերում  բնակվող հայերի համար: Սակայն մինչ օրս չէի գտել այնպիսի մեկին, ում հետ կարող էի իրականացնել տվյալ նախագիծը: Արդյունքում` որոշեցի ինքնուրույն սկսել այս գործը: Իսկ դա, բավականին, դժվար է…Ցանկացած ալբոմ ստեղծելու համար անհարաժեշտ է ունենալ թիմ:

Ձայնասկավառակի աշխատանքներն սկսեցի Ամերիկայում. գրեցի առաջին երգը, խոսեցի գործիքավորողի և ստուդիայի աշխատակցի  հետ, ստեղծեցի թիմ և ձայնագրեցի երգը: Շուտով կրկին կմեկնեմ Ամերիկա և կզբաղվեմ երկրորդ երգի աշխատանքներով: Ընդամենը, ժամանակի հարց է…Անընդհատ շրջագայությունների մեջ եմ լինում, այդ պատճառով էլ մյուս երգերի վրա դանդաղ ենք աշխատում:

- Իսկ, հիմնականում, ի՞նչ ժանրերի երգեր են ընդգրկված լինելու Ձեր` հայալեզու ձայնասկավառակում:

- Որպես էթնիկ հայ` ես մեծացել եմ հայկական երաժշտության ներքո և տարբեր ժանրերի երգեր եմ երգել, օրինակ, Հարութ Փամբուկչյանի և Փոլ Բաղդադլյանի երգացանկից: Ինձ, բացարձակապես, դուր չի գալիս այն, որ այսօր հայկական երաժշտության մեջ խառնում են եվրոպական էլեմենտներ, որոնք չեն սազում մեր երգարվեստին… նույնիսկ բառերն այն չեն…Շատ լավ արտիստներ կան, բայց նրանց երգածը չի համապատասխանում մեր երգարվեստին: Ես ցանկանում եմ երգերի գործիքավորման մեջ ներառել տարբեր ազգերի երաժշտական էլեմենտներ, բայց, մեծապես, պահպանել երգերի հայկական հոգին: Ալբոմում ցանկանում եմ ներառել ժողովրդական, աշուղական, լիրիկական և պարային ստեղծագործություններ: Միգուցե, լինեն այլ կատարողների երգացանկից երգեր… ամեն ինչ դեռ ստեղծման փուլում է:

- Ե՞րբ ձայնասկավառակը կհանձնեք Ձեր երկրպագուների դատին:

-Չգիտեմ… ամեն ինչ ժամանակից է կախված: Տարբեր երկրներում եմ լինում, այդ պատճառով` ֆիզիկապես չեմ հասցնում… Դա է խնդիրը, բայց կփորձեմ կես տարվա ընթացքում ավարտին հասցնել բոլոր աշխատանքները: Ամեն ամիս կցանկանայի մի նոր երգ ներկայացնել…

-Եթե չեմ սխալվում, պատրաստվում եք տեսահոլովակ նկարահանել ձայնասկավառակի երգերից մեկի` «Սարերի ջեյրան աղջիկ» ստեղծագործության հիման վրա: Ե՞րբ և որտե՞ղ եք պատրաստվում նկարահանել տեսահոլովակը:

-Հոկտեմբերի վերջին պատրաստվում եմ գալ Հայաստան և Երևանում նկարհանել տեսահոլովակը: Թե երբ այն պատրաստ կլինի, կախված է արդեն ռեժիսորից: Չեմ ցանկանում ոչ մեկին շտապեցնել, որովհետև ուզում եմ որակյալ աշխատանք ներկայացնել:

 

-Իսկ բացի հայկական հեռուստաալիքներից, պատրաստվո՞ւմ եք տեսահոլովակը հեռարձակել նաև այլ երկրների երաժշտական ալիքներով:

-Հայկական երաժշտությունը, հիմնականում, ստեղծված է հայ ժողովրդի համար… սա լատինաամերիկյան ժանր չէ, որը լսում են ամբողջ աշխարհում: Այնուամենայնիվ, կփորձեմ այնպես անել, որ երգը հնչի ռուսական ռադիոալիքներից մի քանիսով, ինչպես նաև այն հեռուստաալիքներով, որոնց կհետաքրքրի այդ ժանրը: Ռուսաստանում կա «Восток» ռադիոկայանը, որոնց, միգուցե, հետաքրքրի այս ժանրի ստեղծագործությունը: Մաքսիմալ կերպով կփորձեմ այլ ազգերին էլ ծանոթացնել իմ` հայալեզու կատարումներին:

-Ձայնասկավառակում կլինե՞ն այլ երգեր, որոնց հիման վրա ևս կնկարահանեք տեսահոլովակներ:

-Իհարկե, կլինեն… Երբ գամ Հայաստան, ձայնասկավառակիս երկրորդ երգն էլ արդեն պատրաստ կլինի և, միանգամից, երկու տեսահոլովակի վրա կաշխատեմ:

-Իսկ հնարավո՞ր է` այդ ընթացքում մենահամերգով հանդես գաք Երևանում:

-Ոչ… Ցավոք` չեմ հասցնի: Երբ ավարտեմ տեսահոլովակների հետ կապված աշխատանքները, ինձ մոտ արդեն կսկսվի շատ լարված գրաֆիկ…

 

- Ավրաամ, հետաքրքիր է` ինչպե՞ս եք վերաբերվում «Եվրատեսիլին»: Եթե, օրինակ, մի օր Ձեզ առաջարկեն Հայաստանը ներկայացնել այդ մրցույթում, ինչպե՞ս կվարվեք:

-«Եվրատեսիլն» ինձ համար հիանալի մրցույթ է… Դա այն վայրն է, որտեղ տաղանդավոր մարդիկ կարող են ցուցադրել իրենց տաղանդը: Բայց որպես արտիստ, որն արդեն քիչ թե շատ ճանաչված է որոշ երկրներում, կցանկանայի, որ երիտասարդ արտիստներն իրենց տաղանդը ցուցադրելու հնարավորություն ունենային և իրենց համար նոր ճանապարհ հարթեին: Երբեմն, ծիծաղելի է, երբ արդեն հասուն արտիստներ են մասնակցում այդ մրցույթին: Համենայն դեպս` սա իմ սուբյեկտիվ կարծիքն է…Ես հաճույքով կներկայացնեի Հայաստանը, բայց «Եվրատեսիլն» այն մրցույթը չէ, որին կցանկանայի մասնակցել…