Ապշեցնող փաստեր և թվեր McDonald's-ի մասին

McDonald's-ը ստեղծվել է 1940թ.-ին որպես խորովածի կամ, ամերիկացիների լեզվով ասած, բարբիքյուի ռեստորան: Այն պատկանել է Ռիչարդ և Մաուրիս ՄքԴոլանդներին: Աստիճանաբար այդ բիզնեսը սկսեց ճանաչելի ու հասանելի դառնալ՝ իր արագ, մատչելի ու միաժամանակ նաև ոչ առողջարար արտադրանքի շնորհիվ, իսկ այժմ այն ճանաչում են երկրագնդի ցանկացած կետում, անգամ Հայաստանում, որտեղ այն, ցավոք կամ բարեբախտաբար, ներկայացված չէ:
McDonald's-ի կենտրոնը գտնվում է ԱՄՆ-ում: Այն ներկայացված է 119 երկրի 35,000 կետերում: McDonald's-ը տարածվում է ԱՄՆ-ից մինչև Չինաստան, Մեծ Բրիտանիայից Ավստրալիա, Ռուսաստանց Հարավային Աֆրիկա ու սահուն կերպով շրջանցում է Հայաստանը: McDonald's-ն ունի մոտ 1.900.000 աշխատող, որոնք օրական սպասարկում են ավելի քան 68.000.000 հաճախորդի: Պատկերացնո՞ւմ եք: Այսինքն՝ ստացվում է, որ եթե երկրագնդի բնակչությունը 7,125 մլրդ է, ապա օրական McDonald's-ը սպասարկում է երկրագնդի բնակչության մոտ 1%-ին: Շշմել կարելի է:

Հետաքրքիր համեմատություն կարելի է անել.

• 68.000.000 հաճախորդների թվով McDonald's -ի օրական բնակչության թիվն ավելի մեծ է, քան օրինակ Մեծ Բրիտանիայի:
• McDonald's-ը միայն իր ֆրենչայզի խանութներից ստացված 8.7 մլրդ դոլարի եկամտով ավելի հարուստ է, քան Մոնղոլիան:
• Այն կլիներ 90-րդ խոշոր տնտեսություն ունեցող երկիրը՝ հիմնված իր 24 մլրդ դոլարի եկամտի վրա:

Շատ ամերիկացիների համար McDonald's-ում աշխատելը շատ լավ կարիերայի սկիզբ է, քանի որ նա սովորում է լինել արագ, արդյունավետ ու ամենակարևորը, աշխատելով սպասարկման ոլորտում, նա ձեռք է բերում փորձ ու համբերատարություն: Ասում են՝ ամերիկացիներից յուրաքանչյուր 8-ից 1-ը երբևէ աշխատել է McDonald's-ում:
Հայտնի ամերիկյան աստղերից Շերոն Սթոունը, Փինքը, Ջեյ Լենոն և այլոք մինչև հայտնի դառնալը ժամանակին աշխատել են McDonald's-ում: Իհարկե սա չի նշանակում, որ ով գնա աշխատի McDonald's-ում, հետագայում կդառնա հայտնի աստղ, բայց դե փաստ է, նշում ենք:
Այս ցնցող թվերը, հայտնի դեմքերը, ինչպես նաև այդ պահին համեղ թվացող ուտելիքը դնենք մի կողմ ու նշենք, որ միևնույն է՝ ֆաստ ֆուդից ոչ ոք դեռ "չի խերվել": 
Առողջ եղեք և կերեք օրգանական՝ գյուղական, անարատ սնունդ, դրանից լավը դեռ ոչ ոք չի ստեղծել:

Աղբյուրը՝  Barometer.am