Նրանք դարձան Հայաստանի ժողովրդավարության գերեզմանափորերը. «Չե՛ք անցկացնի»-ի ներկայացուցիչը՝ Սահմանադրության նախագծին կողմ քվեարկած ուժերի մասին

Այսօր Աժ-ում տեղի ունեցավ սահմանադրական փոփոխությունների նախագծի քվեարկությունը: 131 պատգամավորներից դեմ քվեարկեցին միայն 10-ը՝ Ստեփան Դեմիրճյանը, Գագիկ Ջհանգիրյանը, Տիգրան Ուրիխանյանը, Զարուհի Փոստանջյանը, Իշխան Խաչատրյանը, Հեղինե Բիշարյանը, Նիկոլ Փաշինյանը, Հրանտ Բագրատրանը, Արամ Մանուկյանը, Լևոն Զուրաբյանը:

Մեկնաբանելով քվեարկության պատկերը՝ «Չե՛ք անցկացնի» նախաձեռնության անդամ Դավիթ Հովհաննիսյանը Past.am-ի հետ զրույցում ասաց, որ տեղի է ունեցել այն, ինչ սպասելի էր:

«Բաղրամյան 26-ի ազդեցության տակ գտնվող ուժերը կողմ քվեարկեցին մի նախագծի, որն իրենից ներկայացնում է Հայաստանի ժողորդավարության վերջը: Նրանք դարձան Հայաստանի ժողովրդավարության գերեզմանափորերը: Միայն 10 պատգամավոր չի ենթարկվել իշխանական ճնշումներին և արտահայտել է իր անկախ դիրքորոշումը»,- նշեց Դավիթ Հովհաննիսյանը:

Ըստ մեր զրուցակցի՝ առավել կարևոր էր ԱԺ-ի դիմաց մոտ 500 քաղաքացիների բողոքի ցույցը: Հովհաննիսյանի խոսքով՝ այդ քաղաքացիները հստակ ցույց տվեցին, որ պայքարելու են մինչև վերջ, նրանք դրա համար չվախեցան բախումների մեջ մտնել ոստիկանների հետ, բերման ենթարկվել:

«Չե՛ք անցկացնի» նախաձեռնության ներկայացուցիչը նաև հայտարարեց, որ հոկտեմբերի 30-ին նախատեսում են հանրահավաք Ազատության հրապարակում: Դավիթ Հովհաննիսյանը փոխանցեց, որ մինչ այդ հանդիպումներ և հանրահավաքներ կլինեն նաև մարզերում, բայց համապետական հանրահավաքը կլինի հոկտեմբերի 30-ին:

«Մենք արդեն դիմել ենք քաղաքապետարան, սպասում ենք նրանց պատասխանին: Այսօրվա երթից առաջ մի տարօրինակ գրություն էինք ստացել առ այն, որ երթը չպետք է խանգարի բնականոն երթևեկությանը: Պարզ է, որ դա անհնար է, եթե փողոցում երթ է: Հետո դատարան դիմեցինք, պարզաբանումներ եղան: Այսօր էլ ոստիկանությունը փորձում էր խանգարել երթը, բայց ցուցարաների ճնշման տակ ստիպված է եղել բացել փողոցը»,- ասաց Դավիթ Հովհաննիսյանը:

Լևոն Փանոսյան