Հայկական «Ինստագրամի» թոփ 10-ը. առաջատարը Սիրուշոն է

Tert.am-ը գրում է.

Այսօր աշխարհում  հաշվում են հայտնի մարդկանց ոչ միայն փողերը, ունեցվածքը, տները, մեքենաները, այլ նաև ուշադրության կենտրոնում են նրանց էջերը տարբեր սոցիալական կայքերում:  Մասնավորապես շատ նորաձև է հետևել, թե ով քանի հազար հետևորդ ունի «Ինստագրամում»:

Մեծ հեղինակություն վայելող այս սոցկայքում առաջին տեղը գրավելու համար մրցում են Բեյոնսեն և Քիմ Քարդաշյանը, Թեյլոր Սվիֆթը և Ռիհաննան: Մենք էլ որոշեցինք ներկայացնել, թե հայկական ինտերնետ տիրույթում ո՞ր աստղերն ունեն ամենաշատ հետևորդները «Ինստագրամում»:

10-րդ հորիզոնականում է Անահիտ Սիմոնյանը: Նրա  «Ինստագրամում» գրված է երգչուհի և դիզայներ: Անահիտ Սիմոնյանի «Ինստագրամի» էջը փակ է այն մարդկանց համար, ովքեր չեն հանդիսանում Անահիտի հետևորդները, այսինքն` Անահիտը փորձում է որոշ չափով սահմանափակել իրեն հետևող աչքերը` չնայած ողջ աշխարհում հայտնի մարդիկ իրենց էջերը հասանելի են պահում բոլորի համար: Անահիտը «Ինստագրամում» կրում է ANAHITSIMONYAN  անունը, ունի 24,8  հազար հետևորդ, ինքը հետևում է 661 հոգու, իսկ տեղադրել է 2338` մեր տասնյակի համար ռեկորդային լուսանկար. եթե մեր տասնյակը դասավորեինք ըստ ակտիվության, ապա Անահիտը կգրավեր առաջին հորիզոնականը:

 

9-րդ հորիզոնականում է «Հարազատ թշնամի» հեռուստասերիալից հայտնի Լիկա Սալմանյանը: Լիկան սելֆիների մեծ սիրահար է,  ակտիվ ինստագրամեր է, սիրում է տեղադրել իր մայրիկի, քրոջ բալիկի, ինչպես նաև կենդանիների լուսանկարներ: Լիկան «Ինստագրամում» կրում է LIKASALMANYAN96  անունը, ունի 25,6  հազար հետևորդ, ինքը հետևում է 173 հոգու, իսկ տեղադրել է 283 լուսանկար:

 

8-րդ հորիզոնականում «Ֆուլ հաուս» սիթքոմի հայտնի դերասան Գոռ Հակոբյանն է: Նա ուժեղ սեռի այն եզակի ներկայացուցիչներից է, որը շատ հաճախ է թարմացնում «Ինստագրամի» իր էջը: Հաճախակի է լուսանկարներ տեղադրում ինչպես նկարահանման հրապարակից, այնպես էլ իր առօրյա կյանքից: Հաճախ նաև կատակում է, ու տարբեր հետաքրքիր կոլաժներ պատրաստում իր հետևորդների համար: Գոռը «Ինստագրամում» կրում է GOR_HAKOBYAN_անունը, ունի 34 հազար հետևորդ, ինքը հետևում է ընդամենը 10 հոգու, իսկ տեղադրել է ավելի քան 400 լուսանկար:

 

7-րդ հորիզոնականում հայտնի երգչուհի Նանան է: Նրա էջի առանձնահատկություններից մեկն այն է, որ նա իր բոլոր լուսանկարների վրա տեղադրում է իր բրենդային լոգոն` մի վարդագույն թագ, որի վրա գրված են N.K. տառերը: Նանան հաճախ է լուսանկարներ տեղադրում. ունի ավելի քան 1500 զետեղած լուսանկար, ինչը բավական շատ է, նա նաև գրառումներ է կատարում տարբեր լեզուներով` հայերեն, ռուսերեն և անգլերեն: Նանան «Ինստագրամում» կրում է NANA_ARMENIAN_SINGER անունը, տեղադրել է 1500 լուսանկար, ունի 34,5 հազար հետևորդ, իսկ ինքը հետևում է 408 հոգու:

 

6-րդ հորիզոնականում Միհրան Ծառուկյանն է, որը նույնպես բավական ակտիվ օգտատեր է, սիրում է թեթև գրառումներ անել, չի վախենում հումորային լուսանկարներից: Նա իր գործընկեր Գոռի նման հաճախ է լուսանկարներ տեղադրում նկարահանման հրապարակից: Ընդհանրապես «Ֆուլ հաուս» սիթքոմի դերասանները բավական ակտիվ են «Ինստագրամում», և հաճախ են ուրախացնում իրենց հետևորդներին` կադրից դուրս մնացած հետաքրքիր դրվագներով: Միհրան Ծառուկյանը «Ինստագրամում» կրում է MIRANTSARUKYAN անունը, ունի 37,8 հազար հետևորդ, անձամբ հետևում է 63 հոգու և տեղադրել է 308  լուսանկար:

 

5-րդ հորիզոնականով ակտիվ ինստագրամերների հնգյակը բացում է «Ֆուլ հաուսի» մեկ այլ ներկայացուցիչ` Անի Երանյանը: Անին նույնպես տեղադրում է և աշխատանքային և ընտանեկան լուսանկարներ: Զետեղել է ծնողների` հոր, մոր, ինչպես նաև եղբոր հետ բազմաթիվ լուսանկարներ: Անին իր «Ինստագրամի» միջոցով մշտապես շնորհավորում է  ընկերներին տարբեր առիթներով, նրանց հաջողություններ մաղթում և հարկ եղած դեպքում նաև թեթև գովազդում: Անի Երանյանը «Ինստագրամում» կրում է ANI_YERANYAN  անունը, ունի 39,6 հազար հետևորդ, հետևում է 114 հոգու և տեղադրել է 431 լուսանկար:

 

4-րդ հորիզոնականը կրկին «Ֆուլ հաուսինն» է, Արփինե Գաբրիելյանին չի կարելի անվանել ակտիվ օգտատեր` չնայած նա բավական թվով լուսանկարներ ունի զետեղած, բայց դա կապված է այն փաստի հետ, որ Արփինեն բավական վաղուց է օգտվում «Ինստագրամից»: Արփինե Գաբրիելյանը «Ինստագրամում» կրում է ARPIGABRIELA անունը, ունի 43,6 հազար հետևորդ, ինքը հետևում է 63 հոգու և տեղադրել է 430 լուսանկար:

 

Մեր հիթ շքերթի 3-րդ հորիզոնականում Նազենի Հովհաննիսյանն է: Նազենին համեմատաբար ավելի ուշ է սկսել ակտիվ օգտվել «Ինստագրամից», բայց այսօր համարվում է դրա ամենաակտիվ օգտատերերից: Նա գրեթե ամեն օր, անգամ օրը մի քանի անգամ գրառումներ է կատարում, լուսանկարներ տեղադրում: Նազենի Հովհաննիսյանը «Ինստագրամում» կրում է NAZENIHOVHANNISYAN անունը, ունի 53,4 հազար հետևորդ, հետևում է 123 մարդու և 499 լուսանկար է տեղադրել:

 

2-րդ հորիզոնականում Լիլիթ Հովհաննիսյանն է: Կար ժամանակ, երբ Լիլիթն ավելի հաճախ էր այցելում իր «Ինստագրամ», հաճախ էր լուսանկարներ տեղադրում, ավելին` նա առաջին հայ աստղն էր, ով հատել էր 50 հազար հետևորդ ունեցողների շեմը, բայց ինչ-ինչ պատճառներով, վերջերս Լիլիթը պասիվացել է, բնականաբար արդեն զիջելով  իր դիրքերը: Թեև երբեմն ամիսներով «Ինստագրամում» լուսանկար չի զետեղում, այնուամենայնիվ, այժմ զբաղեցնում է երկրորդ հորիզոնականը: Լիլիթ Հովհաննիսյանը «Ինստագրամում» կրում է LILITHOVHANNISYAN անունը, ունի 76,8 հազար հետևորդ, ինքը հետևում է 97 հոգու և տեղադրել է 638 լուսանկար:

 

Հայկական «Ինստագրամի» առաջատարը Սիրուշոն է: Նա ունի 87 հազար հետևորդ: Երգչուհին «Ինստագրամի» հնաբնակներից է, ամեն շաբաթ միջինը 3-4 անգամ թարմացնում է իր էջը` տեղադրելով ինչպես աշխատանքային գործունեությունը լուսաբանող, այնպես էլ անձնական բնույթի լուսանկարներ, սակայն դեռևս զերծ է մնում ընտանիքի անդամների լուսանկարները տեղադրելուց (խոսքը որդու և ամուսնու մասին է, քանզի ծնողների լուսանկարները նա հաճախ է տեղադրում):
Սիրուշոն «Ինստագրամում» կրում է SIRUSHOOFFICIAL անունը, ունի 87 հազար հետևորդ, ինքը հետևում է 119 հոգու և տեղադրել է 705 լուսանկար:

 

Աղբյուրը՝  TV Մոլլ շաբաթաթերթ