Կհամագործակցի՞ արդյոք ՀԱԿ-ը «Նոր Հայաստանի» հետ

Ցանկացած անհատ կամ ցանկացած կառույց, կուսակցություն կամ հասարակական կազմակերպություն, որը պայքարում է և պայքարելու է Սերժ Սարգսյանի դեմ և գործող Սահմանադրությունը պահպանելու համար, Հայ ազգային կոնգրեսի համար ընդունելի է: Այդ մասին Past.am-ի հետ զրույցում տեսակետ հայտնեց ՀԱԿ խմբակցության ղեկավար Արամ Մանուկյանը` խոսելով նորաստեղծ «Նոր Հայաստան» փրկության ճակատի հետ համագործակցության մասին:

«Ինձ համար ընդունելի են բոլոր տարբերակները, բոլոր ձևաչափերը, բոլոր միջոցները, որի արդյունքում ժողովուրդը «ոչ» կքվեարկի Սահմանադրական փոփոխություններին: Այստեղ կարևորն այն է, որպեսզի համագործակցությունը լինի ժողովրդի հետ, ցանկացած նախաձեռնություն, որը ժողովրդին կտանի դեպի «ոչ»-ի, մենք ողջունում ենք: Խնդիրը մնում է «ոչ»-ի քանակն ավելացնելը»,- մանրամասնեց Արամ Մանուկյանը` շեշտելով, որ ընդունելի են պայքարի ցանկացած միջոցները:

Պատասխանելով այն հարցին, թե արդյոք ՀԱԿ-ը կիսում է արտահերթ նախագահական և խորհրդարանական ընտրություններ անցկացնելու «Նոր Հայաստանի» պահանջները, կոնգրեսական պատգամավորն արձագանքեց.

«Ինձ համար լրիվ ընդունելի է, քանի որ մենք ունենք երկու խնդիր, որոնք իրար լրացնում են. «ոչ»-ի հաղթանակը և Սերժ Սարգսյանի իշխանության ավարտը: Այս երկուսն իրար փոխլրացնող են, եթե մեկը նպաստելու է մյուսի իրականացմանը, բանականաբար, կողմ եմ»,- եզրափակեց Արամ Մանուկյանը:

Լիլիթ Լալայան