Թոմաս Տուխել. Շատ եմ ցավում, որ Մխիթարյանը մեզ հետ չէ

Դորտմունդի «Բորուսսիայի» գլխավոր մարզիչ Թոմաս Տուխելը ցավում է, որ Հենրիխ Մխիթարյանը չի մասնակցելու Եվրոպայի լիգայի խմբային փուլի երրորդ տուրի` ադրբեջանական «Գաբալայի» հետ հոկտեմբերի 22-ին կայանալիք խաղին: Այս մասին Տուխելը խոսել է Բաքվում կայացած նախախաղյա մամուլի ասուլիսի ժամանակ:

-Շատ եմ ցավում, որ Մխիթարյանը մեզ հետ չէ: Ցավալի է ինչպես սպորտային տեսանկյունից, այնպես էլ մարդկային: Կարծում եմ` ֆուտբոլը չպետք է որևէ առնչություն ունենա տարաձայնությունների, վախի, հոգսերի հետ: Մենք նման որոշում ենք կայացրել` հաշվի առնելով Հայաստանի և Ադրբեջանի հարաբերությունները: Հարգում ենք այդ իրավիճակը և ընդունել ենք որոշում, որը մեզ հանգստություն, ապահովություն է տալիս:

Պետք է փորձենք լրացնել Մխիթարյանի բացակայությունը, բայց նրա ներկայիս մարզավիճակը հաշվի առնելով` մեկ փոփոխությամբ բացը չենք կարող լրացնել: Այժմ երիտասարդ ֆուտբոլիստները հնարավորություն կստանան. Յոնաս Հոֆմանը կարող է առջևի գծում խաղալ և ապացուցել, որ ակումբի համար իր արժեքն ունի,-Տուխելի խոսքը մեջբերված է «Ruhr Nachrichten.de»-ից:

Ավելի վաղ ադրբեջանական մամուլում շրջանառվող լուրերի համաձայն` Մխիթարյանը Ադրբեջանի օրենսդրությամբ չէր կարող ստանալ մուտքի վիզա, քանի որ «համարվում է այդ երկրի սահմանն ապօրինի հատած անձ», իսկ Բաքու այցելելու դեպքում, կարող է ձերբակալվել երկրի քրեական օրենսդրության 318.2 հոդվածով: 2011թ. դեկտեմբերին Հենրիխ Մխիթարյանը բարեգործական այցով եղել է Արցախում և նվերներ է հանձնել մի քանի ընտանիքների: