ԲՀԿ-ն «Այո»-ի քարոզարշավի ժամանակացույցի մշակման փուլում է

«Բարգավաճ Հայաստան» կուսակցությունը սահմանադրական փոփոխությունների «Այո»-ի քարոզարշավը կիրականացնի առանձին` սեփական ծրագրային դրույթներով ու հիմնավորումներով:

Այս մասին  մամուլի սրահում կայացած ասուլիսի ժամանակ հայտնեց ԱԺ ԲՀԿ խմբակցության քարտուղար Վահե Էնֆիաջյանը: «Մենք արդեն իսկ կուսակցության ներսում քննարկել ենք, որ քարոզարշավին մասնակցելու ենք առանձին, ներկայացնելու ենք մեր ծրագրային դրույթները, մեր հիմնավորումները: Այս պահին քարոզարշավի ժամանակացույցի քարտեզի վրա ենք աշխատում»,-հայտնեց պատգամավորը:

Հարցին ի պատասխան, թե ով կղեկավարի ԲՀԿ քարոզչական շտաբը, Վահե Էնֆիաջյանը նկատեց. «Ներկայում կազմակերպչական աշխատանքներն ենք հստակեցնում, թե ով է ղեկավարելու ընդհանուր գործընթացը: Մենք ունենք կոլեգիալ մարմնի մոտեցումը, և չի բացառվում, որ առաջիկայում էլ նույն ձևաչափով մեր գործուներությունը ծավալենք: Այսինքն` կուսակցության ղեկավար մարմնի ներկայացուցիչներն ավտոմատ ձևով ստանձնելու են աշխատանքների կազմակերպման գործընթացը և իրենք էլ ներկայացնելու մեր մոտեցումները»:

Վահե Էնֆիաջյանը հայտնեց, որ իրենք շատ են կարևորում Հայաստանում տեղի ունեցող հատկապես այս գործընթացը և իրենց առաքելությունը տեսնում են հասարակության շրջանում սահմանադրական փոփոխությունների շուրջ իրազեկվածության բարձրացման մեջ:  «Երեկ Արտաշատ քաղաքում հանդիպում ենք ունեցել մեր տարածքային գրասենյակի ներկայացուցիչների, ինչպես նաև ժողովրդի հետ ու հասկացել, որ հասարակության զգալի հատվածը մանրամասն տեղեկացված չէ, թե ինչ փոփոխություններ են տեղի ունենում: Այս համատեքստում մենք ցանկանում ենք լավագույնս ներկայացնել, թե ինչ փոփ ոխություններ են ներկայացված ու կառավարման մոդելի մեջ ինչպիսի տարբերություններ ու առանձնահատկություններ կան»,-նշեց պատգամավորը:

Նրա հավաստմամբ` նման հանդիպումներից հետո մարդիկ մոտ «այո» ասելու ցանկությունն ավելի է գերակշռում, քան «ոչ» ասելունը:

ՀՀ նախագահ Սերժ Սարգսյանը հոկտեմբերի 8-ին հրամանագիր է ստորագրել Հայաստանի Հանրապետության Սահմանադրության փոփոխությունների հանրաքվեն 2015թվականի դեկտեմբերի 6-ին նշանակելու մասին: