Կառավարությունը հաստատեց ՀԿ-ների լիազորություններն էապես ընդլայնող օրենսդրական փաթեթը

 ՀՀ կառավարությունը հաստատեց «Հասարակական կազմակերպությունների մասին» և հարակից մի շարք օրենքներում փոփոխություններ կատարելու օրենքի նախագծերի փաթեթը, որով էապես ընդլայնվում են ՀԿ-ների գործունեության լիազորությունները:

ՀՀ արդարադատության նախարար Արփինե Հովհաննիսյանը նշեց, որ նախագիծը երկար պատմություն ունի ու երկար ճանապարհ է անցել: Նախարարը դրա ընդունումը կարևորեց ՀԿ-ների ազատ ու արդյունավետ գործունեության պայմանների ստեղծման տեսանկյունից, ինչը հասարակության կայուն զարգացման համար կարևոր նախադրյալ է։ «Մասնավորապես 2009թ. սեպտեմբերին կառավարության կողմից ԱԺ է ներկայացվել մի փաթեթ, որտեղ նախատեսվում էին մի շարք վերահսկողական գործիքների կիրառում, ինչն առաջացրել էր բազմաթիվ ՀԿ-ների մտահոգությունը և դժգոհությունը։ Արդյունքում ստեղծվեց մի քաղաքացիական նախաձեռնություն, որի շուրջ համախմբվել էր 300 ՀԿ։ Նրանց նպատակն էր ավարտին հասցնել ու ամփոփել քաղաքացիական հասարակության բոլոր ներկայացուցիչների մտահոգությունները՝ կապված այս օրենքների նախագծերի փաթեթի հետ»,- ասաց նախարարը։ Հովհաննիսյանն ընդգծեց, որ ներկայացված փաթեթը քննարկվել է բոլոր շահագրգիռ կողմերի հետ, և հաշվի են առնվել նրանց բոլոր առաջարկությունները։

Ըստ նախարարի, https://www.e-register.am/ համակարգի միջոցով ՀԿ-ների համար կստեղծվի առցանց գրանցման հնարավորություն: Բացի այդ, ՀՀ իրավաբանական անձանց պետական գրանցման ռեգիստրի գործակալության սպասարկման բաժնի բոլոր գրասենյակներում՝ կստեղծվի փաստաթղթերի ընդունման հնարավորություն: Այդպիսով, կպարզեցվի և կհստակեցվի ՀԿ-ների պետական գրանցման վարչարարությունը՝ գրանցվող կազմակերպություններն ազատելով ավելորդ գործընթացներից: Փաթեթով հնարավորինս կբացառվեն ՀԿ-ների՝ շփոթության աստիճան նմանանվանումները և խորհրդանիշները, կկատարելագործվի ՀԿ-ների ստեղծ ման, կառուցվածքի ձևավորման, կառավարման մարմինների կազմավորման և գործունեության կազմակերպման համակարգը, ինչպես նաև կբարձրացվի կանոնադրության դերը, որը խթան կհանդիսանա ՀԿ-ների ինստիտուցիոնալ զարգացման համար, ՀԿ-ներին ձեռնարկատիրական գործունեությամբ զբաղվելու իրավունքի ընձեռմամբ՝ նրանց կտրամադրվի ֆինանսական կայունությունը ապահովող արդյունավետ գործիք:

ՀՀ վարչապետ Հովիկ Աբրահամյանն իր հերթին նշեց, որ կառավարությունը, կարևորելով քաղաքացիական հասարակության դերը ժողովրդավարության զարգացման գործում, հաշվի առնելով հանրային քննարկումներն ու մասնագիտական տեսակետները, ներկայացնում է նախագիծը՝ որպես քաղաքացիական հասարակության կազմակերպությունների զարգացման ինստիտուցիոնալ և օրենսդրական բարեփոխումներ ծրագիր։ «Նախագծով մի շարք նորամուծություններ են առաջարկվում, մասնավորապես կարևորում եմ կամավորների ինստիտուտի ներմուծումը, ինչը ապահովում է յուրաքանչյուր հասարակության բարեկեցո ւթյունը, նաև նպաստում է մարդկային կենսակերպի բարելավմանը։ Կարևորում եմ ՀԿ-ների ձեռնարկատիրական գործունեությամբ զբաղվելու հնարավորության ընդլայնումը, ինչը կարող է հիմնարար նշանակություն ունենալ նրանց ինքնուրույնության և ֆինանսական կայունության համար»,-  ասաց Աբրահամյանը՝ կարևորելով նաև նախագծով առաջարկվող ՀԿ-ների հաշվետվողականության բարձրացումը։ Նրա խոսքով՝ փաթեթով տարանջատում է դրվում հանրային միջոցների հաշվին ֆինանսավորվող ՀԿ-ների և այլ աղբյուրներից սնվող ՀԿ-ների հաշվե տվողականության միջև։ Վարչապետը միաժամանակ ընդգծեց, որ ՀԿ-ների արագ գրանցումը կարևոր նշանակություն կունենա հասարակության առաջ ծառացած խնդիրների լուծման համար: