Ավագանու նիստը խափանվեց, Մարտին Վարդազարյանին էլ հիվանդանոց տարան

Քիչ առաջ բավականին լարված իրավիճակ առաջացավ  Երևանի ավագանու այս տարվա առաջին նիստի ժամանակ: «Երկիր ծիրանի» խմբակցության անդամներն իրենց հետ բերել էին Նուբարաշենի քրեակատարողական հիմնարկի վնասված կոյուղու ջրից և նիստի ընթացքում բացեցին կեղտաջրով լի սրվակը: Դրանից հետո հոտը տարածվել էր նիստերի դահլիճում՝ ստեղծելով խառնաշփոթ:  «Երկիր Ծիրանի»-ի անդամները Նուբարաշենից բերված կոյուղաջրով լի շիշը փորձեցին  մոտեցնել քաղաքապետ Տարոն Մարգարյանին։

Հանրապետականի ավագանու անդամների ու «Երկիր Ծիրանի» խմբակցության անդամների միջև հրմշտոց սկսվեց։ Հանրապետականները նիստերի դահլիճից քաշելով դուրս հանեցին ընդդիմադիր խմբակցության անդամներին։ Նույնիսկ ծեծկռտուք տեղի ունեցավ «Երկիր Ծիրանի» և Հանրապետական խմբակցությունների անդամների միջև։

Հիշեցնենք՝ երեկ Նուբարաշենի խճուղու հարակից շենքի բնակիչները մի քանի րոպեով փակել էին «Նուբարաշեն» քրեակատարողական հիմնարկ տանող ճանապարհը։ Նրանք բողոքում էին քրեակատարողական հիմնարկի կոյուղուց տարածվող գարշահոտությունից։ Այսօր ընդդիմադիր խմբակցությունը հենց այդ տարածքից վերցված կոյուղաջուրն էր բերել քաղաքապետին։

Կեղտաջուրը նիստերի դահլիճում տարածելու նրանց գործողությունները փորձեցին կանխել նիստի ներկաներն ու  հրմշտոց տեղի ունեցավ և Հանրապետական ու «Երկիր ծիրանի» խմբակցությունների անդամները սկսեցին հարվածել միմյանց:
Past.am-ը փորձեց «Ելք» խմբակցության ներկայացուցիչ Արայիկ Հարությունյանից կատարվածի մասին մեկնաբանություն ստանալ, սակայն նա պատասխանեց, որ այս պահին իրավիճակը շարունակում է լարված մնալ և խոստացավ մեր հարցերին ավելի ուշ պատասխանել:

Քաղաքապետի օգնական Մարիա Բարաղամյանն էլ րոպեներ առաջ Facebook սոցիալական ցանցի իր միկրոբլոկում կատարեց հետևյալ գրառումը.
«Մարդիկ համակարգիչների առջև նստած ուրախանում են, իսկ այստեղ կոնկրետ մարդիկ վատանում են։ Երևանի ավագանու անդամ Մարտին Վարդազարյանին քիչ առաջ տարան Նորք Մարաշ սրտաբանական կլինիկա, նենց շան հոտ էին գցել ողջ դահլիճով, հակագազ էր հարկավոր: Այսօրվա թատրոնը բոլոր տեսակի սահմաններն անցավ»,- գրել է նա:

Արմինե Գրիգորյան