«Ժառանգություն» կուսակցության առաջնորդը՝ ՕԵԿ-ի հետ համագործակցության մասին

 

Ի տարբերություն ՕԵԿ-ի, «Ժառանգություն» կուսակցությունը հայ իրականության մեջ հենց սկզբից առանձնացավ իր ներքին ժողովրդավարական սկզբունքներով: Բացի այդ, հայկական քաղաքական դաշտին տվեց թե՛ քաղաքական դեմքեր, թե՛ անուններ: Այսինքն, «Ժառանգությունը» երբեք էլ չդարձավ այն կոնսերվատիվ, եսակենտրոն և միաբևեռ քաղաքական ուժը, որը կարող էր վախենալ բազմակարծությունից կամ ներքին գաղափարական հակասություններից:

Իհարկե, ժամանակի ընթացքում եղան նաև կուսակցությունը լքողներ, բայց նրանցից ոչ մեկն էլ երկրի քաղաքական անցուդարձից չմեկուսացավ: Ընդհակառակը՝ քաղաքական ու հասարակական ներկապնակը հարստացրեց նոր գույնով ու տեսակով`շարունակելով ընթանալ երկրի քարացած համակարգը բարեփոխելու ճանապարհով:
Ի դեպ, կրկին ի տարբերություն ՕԵԿ-ի, «Ժառանգություն» կուսակցությունում նախագահների, փոխնախագահների աթոռնմերը հավերժ չեն: Որպես ապացույց, հիշեցնենք` օրերս, «Ժառանգության» վարչությունը Արմեն Մարտիրոսյանին ընտրեց կուսակցության նախագահ, իսկ Րաֆֆի Հովհաննիսյանը դարձավ քաղաքական խորհրդի պատասխանատուն:

Արմեն Մարտիրոսյանը Past.am-ի հետ զրույցում նշեց, որ առաջին անգամը չէ, որ ինքն ընտրվում է կուսակցության նախագահ: 2009-2010 թվականներին էլ է ղեկավարել կուսակցությունը: Դիտարկմանը, թե ԱԺ ընտրություններից հետո կուսակցությունն առանձնապես ակտիվ չէր, ընտրություններից հետո հնարավո՞ր է ավելի ակտիվանա, «Ժառանգության» ղեկավարը պատասխանեց.
«Համաձայն չեմ և չեմ ընդունում այդ հարցադրումը, քանի որ «Ժառանգությունը» ակտիվ է եղել այնքանով, որքանով երկրում քաղաքական պրոցեսներն են ակտիվ եղել: Մեր կուսակցությունն իր ստեղծման օրվանից միայն պայքարող կուսակցություն է եղել և այդպիսին էլ մնալու է: Մենք արմատական բարեփոխումների կողմնակից ենք եղել, այդպիսին էլ մնալու ենք և ամեն ինչ անելու ենք, որպեսզի երկրում իրավիճակ փոխվի, արմատական բարեփոխումների միջոցով կարողանանք ազատականացնել և՛ տնտեսությունը, և՛ քաղաքական դաշտը, և՛ արդար դատական համակարգ կարողանանք ձևավորել, և՛ փորձենք անվտանգության խնդիրները լուծել»,- ասաց Ա. Մարտիրոսյանը:
Արմատական փոփոխություններ ասելով` քաղաքական գործիչը նկատի ունի երկրի ներսում համակարգային փոփոխություն՝ նոր Սահմանադրության ընդունման միջոցով: Նրա խոսքով Հայաստանը դեռևս Սահմանադրություն չի ընդունել, քանի որ բոլոր Սահմանադրությունների հանրաքվեներն էլ կեղծված են եղել:
«Ե՛վ 1995 թվականինը, և՛ 2005-ինը, և՛ 2015-ինը: Բոլորն էլ կեղծիքներով են ընդունվել: Ոչ մեկն էլ ժողովրդի կողմից չի ընդունվել: Ինչ վերաբերում է Սահմանադրության բովանդակությանը, ապա դա էլ պետք է արմատապես փոխվի, քանի որ ներկա կառավարման համակարգը Սահմանադրությամբ, օրենքներով և գործընթացներով միտված է նրան, որ ընդամենը մի քանի ընտանիք կարողանա ամբողջ հանրային ռեսուրսը կենտրոնացնել իր ձեռքում: Բայց մեզ պետք է այնպիսի կառավարման համակարգ, որտեղ հանրային  և բնական ռեսուրսները կծառայեն բոլոր քաղաքացիների և պետության կարիքները հոգալուն»,- ասաց Ա. Մարտիրոսյանը:
Նա նշեց, որ առաջիկայում բոլոր այն կուսակցությունների հետ, ովքեր արմատական բարեփոխումների անհրաժեշտություն են տեսնում, փորձելու են ընդդիմադիր միասնական դաշտ ստեղծել: Բայց, պայքարի ճանապարհին պետք է ոչ թե կուսակցություններն իրար կողքի կանգնեն, այլ կարողանան միասնական պայքարել:
«Մեկ բան միանշանակ է, որ Հայաստանն ունի կառավարման համակարգի փոփոխության մեծագույն կարիք, և եթե դա տեղի չունենա, ապա 2022 թվականի խորհրդարանական ընտրությունները նորից կեղծված են լինելու: Եվրամիության հետ Հայաստանը ստորագրել է համաձայնագիր, որտեղ խոսվում է ժողովրդավարական արմատական փոփոխությունների մասին: Մենք պետք է փորձենք այդ արմատական փոփոխությունները կյանքի կոչել՝ չպետք է ունենանք քաղբանտարկյալներ, մոնոպոլացված քաղաքական և տնտեսական դաշտ»,- ասաց Ա. Մարտիրոսյանը:
Քաղաքական գործիչը ո’չ բացառեց, ո’չ հաստատեց ՕԵԿ-ի հետ հետագա քայլեր իրականացնելու հավանականությունը, քանի որ ավելի կարևորում են կուսակցությունների սկզբունքների և ծրագրերի համադրումը: Խոսելով բարեփոխումների ծրագրերը դանդաղ շտապելով իրականացնելու մասին` Ա. Մարտիրոսյանն ասաց.
«Դանդաղ շտապելու հետևանքով մեր երկիրը ոչ միայն որակական փոփոխությունների է ենթարկվում, այլև՝ քանակական: Ուստի, ոչ թե պետք է դանդաղ շտապենք, այլև շատ արագ պետք է գործենք, քանի որ բազմաթիվ ճահճացած հարցեր ունենք, որոնց լուծումները պետք է արագ տրվեն: Կհաջողվի, թե՝ ոչ, ժամանակը ցույց կտա, բայց որ այընտրանք չկա, միանշանակ է»,- ասաց Ա. Մարտիրոսյանը:

Արմինե Գրիգորյան