Ռուսական պրոպագանդան այլ բան չի կարող. միջազգային մամուլն ու ռուսական ԶԼՄ-ների հիստերիան

Հանրապետությունում շարունակվում են Սերժ Սարգսյանի վարչապետության դեմ իրականացվող ցույցերն ու ակցիաները: Հայաստանում կատարվող իրադարձություններին անհաղորդ չէ նաև միջազգային մամուլը, ինչպես նաև միջազգային մի շարք կառույցներ:

Օրինակ՝ Աշխարհաքաղաքական վտանգների միջազգային վերլուծական կենտրոնը՝ «Foreign Brief»-ը, նշել է, որ Սերժ Սարգսյանի նշանակումը վարչապետի պաշտոնում կասկածի տակ է դնում Հայաստանի ժողովրդավարության կայունությունը: «Ֆրանսպրեսը»-ն էլ իր հրապարակման մեջ շեշտել է, որ Սերժ Սարգսյանը պատրաստվում է ատամներով կառչած մնալ իշխանությանը և այս անգամ՝ արդեն վարչապետի պաշտոնում: Ռուսական լրատվամիջոցների մի մասի արձագանքը, սակայն, տարբերվում է արևմտյան լրատվամիջոցների գնահատականներից: Մի շարք ԶԼՄ-ներ իրենց հրապարակումներում անգամ համեմատական են անցկացնում «Մայդանի» հետ: Օրինակ՝ «Взгляд»-ն իր հոդվածը վերնագրել էր այսպես՝ «Новый армянский майдан раскачивают «грантоеды»»:

Քաղաքագետ Ռուբեն Մեհրաբյանը Past.am-ի հետ զրույցում շեշտեց, որ արևմտյան լրատվամիջոցները ժամանակին և համարժեք արձագանքեցին Հայաստանում տեղի ունեցող իրադարձություններին:

«Նշեցին, թե հատկապես ինչն է նման բողոքի ալիք բարձրացրել: Որևէ տենդենցիոզ բաներ արևմտյան լրատվամիջոցներում չկան: Այլ է իրավիճակը ռուսական լրատվամիջոցների պարագայում. «Ամերիկյան դեսպանատան ձեռք», «ԱՄՆ պետդեպարտամենտի ոտք», «Մայդան» և նման անսթափ հայտարարություններ: Կարծում եմ, այդուհանդերձ, նման գնահատականները Հայաստանի հանրության կողմից արհամարհվում են և բացի ծիծաղից, այլ բան չեն հարուցում: Ընդհանուր մեդիապատկերը սա է»,-ասաց քաղաքագետը:

Իսկ թե ինչպե՞ս է բացատրվում ռուսական ԶԼՄ-ների նման դիրքորոշումը, քաղաքագետը նշեց. «Դա պայմանավորված է ռուսական պետական մեդիամեքենայի նեոկայսերական ռեֆլեքսներով: Բացի այդ՝ տեսնում ենք, որ ռուսական ոչ բոլոր ԶԼՄ-ներն են տրվում նման ալիքի: Շատ թե քիչ լուրջ ռեսուրսները նման ոգով չեն անդրադառնում իրադարձություններին, այլ ուղղակի տեղեկացնում են, թե ինչ է տեղի ունենում: Օրինակ է «РБК» գործակալությունը: Պրոպագանդիստական, կայսերապաշտ և հետադիմական նման հիստերիա են բարձրացրել նաև որոշ ռուս քաղաքական գործիչներ: Ռուսական պրոպագանդան այլ բան չի կարող: Ռուսական մտածողությունը չի փոխվել: Ըստ նրանց՝ հնարավոր չէ, որ նորմալ մարդիկ ընդվզեն ոչ էֆեկտիվ ու արդեն հոգնեցրած, ոչ կոմպետենտ իշխանության դեմ: Ըստ նրանց՝ դա հնարավոր է միայն ամերիկյան միջամտությամբ կամ ամերիկյան դեսպանատան ձեռքով: Այդպիսի կոնսպիրոլոգիական մտածելակերպը բնորոշ է ռուսաստանյան քաղաքականությանը: Իրենք ամեն ինչ հենց այդ շրջանակներում են տեսնում»:

Ռուբեն Մեհրաբյանն այս ամենի համատեքստում կարևորեց հատկապես ԱՄՆ-ի պետքարտուղարության արձագանքը, որում մասնավորապես նշվել էր. «Մեզ ոգևորում է ցուցարարների մեծ մասի ու ոստիկանության հարգալից և պատասխանատու վարքի դրսևորումն այս վերջին մի քանի օրերի ընթացքում: Մենք անհանգստացած ենք, սակայն, ոստիկանության և ցուցարարների միջև երբեմն տեղի ունեցող բախումների մասին տեղեկությամբ, որի ընթացքում եղել են տուժածներ: Կոչ ենք անում բոլոր կողմերին զսպվածություն ցուցաբերել և խուսափել որևէ լարվածությունից կամ բռնի գործողություններից»:

Քաղաքագետի խոսքով՝ հայտարարությունը միանգամայն բխում էր իրավիճակից. «Այն բարեկամական էր և հայ-ամերիկյան հարաբերություններին հարիր: Ուղղակի զսպվածության կոչ արվեց՝ շարունակել բոլոր հարցերը կարգավորել խաղաղ ճանապարհով: Ի տարբերություն մեր որոշ պետական ինստիտուտների՝ ԱՄՆ պետքարտուղարությունն այդ ցույցերը դիտարկեց որպես ոչ թե անօրինական գործողություններ, այլ զուտ որպես իրավունքի իրացում: Իհարկե՝ եթե այդ ամենը խաղաղ ճանապարհով է: Բայց մենք տեսնում ենք, որ շարժման կազմակերպիչները շեշտում են, որ բացառապես խաղաղ և բռնությունը բացառող ու մերժող ճանապարհով պետք է հասնեն իրենց քաղաքական նպատակներին»:

Աննա Բադալյան

Այս թեմայով Թուրք-ադրբեջանական տրամադրությունները ներհայաստանյան իրադարձությունների ֆոնին Երկրում մթնոլորտ է փոխվել. ՀՀԿ-ի ռեսուրսները չեն աշխատելու Ռուբեն Հախվերդյան. «Քրեաօլիգարխիկ համակարգի վրա հիմնված իշխանությունները կսկսեն անհանգիստ շարժումներ անել» Զուգահեռ իրականություն... Սիրիական ճգնաժամն ամենաթեժ փուլում է. ի՞նչ է սպասվում տարածաշրջանին