Համոզված եմ՝ ֆուտբոլը մեզ ավելի սերտորեն կկապի Երեւանի հետ. գերմանացի քաղաքապետ

Երեւանի քաղաքապետ Տարոն Մարգարյանը հանդիպել է Գերմանիայի Դաշնային Հանրապետության 12 քաղաքների քաղաքապետերի պատվիրակության հետ: Հանդիպմանը ներկա է գտնվել նաեւ ՀՀ-ում ԳԴՀ արտակարգ եւ լիազոր դեսպան Ռայներ Մորելը: Ողջունելով հյուրերին` քաղաքապետ Տարոն Մարգարյանը, նախ համառոտ ներկայացնելով Երեւանի կառավարման համակարգն ու առաջնահերթությունները, նշել է, որ այսօր Երեւանի զարգացման ծրագրերով հստակ քայլեր են ձեռնարկվում քաղաքային կառավարման տարբեր ոլորտներում զարգացումներ ապահովելու ուղղությամբ: Անդրադառնալով միջազգային համագործակցությանը` քաղաքապետն առանձնացրել է նաեւ այն ոլորտները, որոնց շրջանակում Երեւանի քաղաքապետարանն այսօր արդյունավետ փոխգործակցություն է իրականացնում գործընկեր քաղաքների հետ:

«Մայրաքաղաքի արդյունավետ կառավարման հարցում մենք կարեւորում ենք նաեւ միջազգային փորձի փոխանակումը: Այս տեսանկյունից, անշուշտ, շատ կարեւոր է նաեւ գործընկեր քաղաքների հետ արդյունավետ փոխգործակցության խթանումը: Երեւանը տարեցտարի ընդլայնում է գործակցության շրջանակներն ու այսօր համագործակցում է աշխարհի շուրջ 50 քաղաքների հետ: Ըստ այդմ, համոզված եմ, որ առաջիկայում արդյունավետ գործակցություն կհաստատենք նաեւ գերմանական քաղաքների հետ եւ այս հարցում, անշուշտ, մեծ է Հայաստանի Հանրապետությունում  Գերմանիայի, ինչպես նաեւ Գերմանիայի Դաշնային Հանրապետությունում Հայաստանի Հանրապետության դեսպանությունների դերը», - ընդգծել է Տարոն Մարգարյանը:

Անդրադառնալով Երեւանի քաղաքապետարանի եւ վարչական շրջանների աշխատակազմերի ու Գերմանիայի քաղաքապետերից կազմված ֆուտբոլային թիմերի ընկերական հանդիպմանը` քաղաքապետ Տարոն Մարգարյանը շնորհակալություն է հայտնել Գերմանիայի Հեսսենի երկրամասում ՀՀ պատվավոր հյուպատոս Բրայան Սթիվեն Ֆերային նախաձեռնության համար, նկատելով, որ այն եւս մեկ հրաշալի առիթ է ամրապնդելու երկու ժողովուրդների բարեկամությունն ու այցի շրջանակում քննարկելու գործակցության ձեւավորման ու ընդլայնման հետ կապված հարցեր:

Իր եւ Գերմանիայի քաղաքների քաղաքապետերի պատվիրակության անդամների անունից շնորհակալություն հայտնելով ջերմ ընդունելության համար` հանդիպմանը ներկա ՀՀ-ում Գերմանիայի Դաշնային Հանրապետության արտակարգ եւ լիազոր դեսպան Ռայներ Մորելը ողջունել է գերմանական քաղաքների հետ գործընկերային սերտ կապեր հաստատելու Երեւանի քաղաքապետի պատրաստակամությունը եւ իր հերթին վստահեցրել է, որ իր լիազորությունների շրջանակում կնպաստի հնարավորին կարճ ժամանակում այդ հարաբերությունները ձեւավորելուն եւ զարգացնելուն:

Գերմանիայի Աբշտայնախ քաղաքի քաղաքապետ, Գերմանիայի քաղաքապետերից կազմված ֆուտբոլային թիմի ղեկավար Ռոլֆ Ռեյնարդն իր հերթին նկատել է, որ, ընդունելով իրենց առաջարկը, Երեւանն, ըստ էության, բարեկամական ձեռք է մեկնել գերմանական քաղաքներին: «Մեզ համար իսկապես հաճելի է տեսնել ու զգալ այն հյուրընկալությունն ու ջերմ ընդունելությունը, որ ցուցաբերվեց Երեւանում առաջին իսկ պահից: Այցի շրջանակում մենք հասցրել ենք արդեն փոքր-ինչ ծանոթանալ Երեւանի պատմությանն ու քաղաքի անցուդարձին, եւ պետք է վստահեցնեմ, պարոն քաղաքապետ, որ տպավորված ենք Երեւանով: Եվ համոզված եմ, որ ֆուտբոլը մեզ ավելի սերտ կապերով կկապի Երեւանի հետ»,- նշել է  Ռոլֆ Ռեյնարդը:

Հաջողություն մաղթելով ֆուտբոլային երկու թիմերին այսօր երեկոյան Վազգեն Սարգսյանի անվան հանրապետական մարզադաշտում կայանալիք ընկերական խաղում` քաղաքապետ Տարոն Մարգարյանը մեկ անգամ եւս ընդգծել է, որ Երեւանի քաղաքապետարանը բաց եւ պատրաստակամ է ինչպես համագործակցության, այնպես էլ տարբեր ձեւաչափերով բարեկամական կապերի ընդլայնման ու ամրապնդման հարցում: