Իբր ին­չի՞ եք ձևական քննար­կում­ներ անում

Կառավարության նիստում երեկ տեղի ունեցած մի միջադեպ կարող էր ուղղակի լռության մատնվել, եթե իր մեջ խորքային շերտեր չպարունակեր: Արտաքուստ աշխատանքային խոսքուզրույց էր, դեմոկրատական կառավարությանը բնորոշ. առողջապահության նախարարը մի հարցի վերաբերյալ դժգոհություն հայտնեց, որ իրենց անտեսել են, վարչապետն էլ զայրացավ նրա վրա: Բայց...

Սկսենք վարչապետի տոնայնությունից: Այն, որ Փաշինյանը հաճախակի է դուրս գալիս ափերից ու հաճախ չի կարողանում զսպել իրեն, նորություն չէ: Դա նորություն չէ հատկապես իր հետ հաճախակի շփումներ ունեցողների համար: Բայց որ կարող է հրապարակային այդ տոնով խոսել նախարարի հետ, մեղմ ասած, զարմանալի է: Կրկնում ենք՝ խոսքը դիտողություն անելու մասին չէ, ղեկավար-ստորադաս առանձին, «տետ ա տետ» շփման մասին չէ, այլ ոճի ու տոնայնության, այն էլ՝ հրապարակային: Քիչ չեն այնպիսիք, որոնք տեղում հրաժարական կտային՝ սոսկ արժանապատվությունից ելնելով: Բայց գուցե պաշտոնը քաղցր բան է:

Հաջորդը: Այս դիպվածը ցույց է տալիս, որ կառավարությունը երկու ոտքով կաղում է համակարգվածության առումով: Մենք առիթ ունեցել ենք անդրադառնալու, որ ամեն նախարար փորձում է իր պատկերացումներն առաջ տանել: Նշել ենք նաև, որ Արսեն Թորոսյանը հիանալի տիրապետում է PR արվեստին և կարողանում է իր ամեն քայլը գրագետ ներկայացնել: Իհարկե, ցանկացած նախարար իր ոլորտի պատասխանատուն է, և շատ լավ է, որ նախաձեռնող է, այլ ոչ միայն կատարող: Սակայն նախարարն ու նախարարությունը առանձին կառավարություն չեն կառավարության մեջ: Նրանք պետության քաղաքականության իրագործողն են իրենց ոլորտներում, թիմի մասնիկ են, ուրեմն առաջնային պետք է լինի ծրագրային, համակարգված աշխատանքը, ինչի հետ կախված լուրջ խնդիրներ կան:

Վերջապես, անհասկանալի է միաձայնության այն մոլուցքը, որ առկա է իշխանության շրջանում: Կհիշեք, որ դեռ ինն ամիս առաջ, երբ Փաշինյանը նոր էր ընտրվել վարչապետ, Արծվիկ Մինասյանի՝ մի հարցում ընդդիմանալու հետ կապված ինչ սկանդալ սարքեց նիստի ժամանակ: Վարչապետի համոզմամբ, կառավարության բոլոր որոշումները պետք է միաձայն ընդունվեն: Հիմա հարց. ինչի՞ համար են այս ձևական քննարկումները նիստի ժամանակ, ինչի՞ համար են անիմաստ «ձեռքբարձրացնոցի» քվեարկությունները: Վերացրեք, մեկ է, բոլորը կողմ են քվեարկելու, հակադրվողների վրա էլ վարչապետն ամբողջ ուժով զայրանալու է...

ԱՐՍԵՆ ՍԱՀԱԿՅԱՆ