Սա միայն փողի հարց չէ. Րաֆֆի Հովհաննիսյան

Խոսելով «Ոչ թալանին» նախաձեռնության պայքարի ռազմավարության և նստացույցի մասին՝ «Ժառանգություն» կուսակցության նախագահ Րաֆֆի Հովհաննիսյանը Past.am-ին ասաց. «Այդ մարտավարությունը իմ կարծիքից կախված չէ, բայց ես ողջունում եմ պայքարի ցանկացած սահմանադրական դրսևորում: Մենք պետք է հասնենք իրավական, ժողովրդին պատկանող սահմանադրական պետության: Կարևոր է հասկանալ, որ սա միայն փողի հարց չէ, սա իրավունքի հարց է»: 

Հարցին՝ ի՞նչ հանգուցալուծում է տեսնում, Հովհաննիսյանը ժպտալով պատասխանեց. «Ժողովուրդը հաղթելու է»:

ՀԱԿ պատգամավոր Արամ Մանուկյանն էլ ասաց. «Ցանկացած մեթոդ, ցանկացած ճնշման ձև արդարացված է: Սա օրենքի մեջ է, շատ էլ լավ են անում պայքարողները»:

Երևանի ավագանու «Բարև Երևան» դաշինքի անդամ Արմեն Մարտիրոսյանը խուսափեց գնահատական տալուց: Վերջինս մասնավորապես նշեց. «Չեմ ուզում գնահատական տալ և իմ պատկերացումները հնչեցնել, որովհետև որոշում կայացնողները քաղաքացիական դաշտի ներկայացուցիչներն են: Ես ամբողջովին չգիտեմ՝ նրանց ծրագիրը որն է: Եթե ամբողջ պլանին գոնե մի փոքր ծանոթ լինեի, ինչ-որ ձևով կփորձեի պատասխանել հարցին, բայց, քանի որ տեղյակ չեմ, ձեռնպահ կմնամ գնահատականներ տալուց, որովհետև իմ կանխատեսումը` ճիշտ լինելով հանդերձ, կարող է վնասել: Ես միանշանակ չեմ ցանկանում որևէ կերպ վնաս հասցնել նրանց քայլերին»: Ըստ մեր զրուցակցի՝ պայքարի հաջողությունը պայմանավորված է քաղաքացիների աջակցությունից:

Հիշեցնենք, որ երեկ Ազատության հրապարակում տեղի ունեցավ «Ընդդեմ էլեկտրաէներգիայի ապօրինի թանկացման» հանրահավաք, որի ժամանակ կազմակերպիչները հայտարարեցին նստացույցի մասին:

«Ոչ թալանին» նախաձեռնության անդամ Վաղինակ Շուշանյանը մասնավորապես ասաց. «Մենք մնալու ենք և պայքարելու մինչև վերջ, այստեղ կմնանք մինչև երկուշաբթի ժամը 19.00-ն: Եթե իշխանությունները մինչ այդ հանդես չգան հայտարարությամբ այն մասին, որ հոսանքի գինը չի բարձրանալու, կշարժվենք Բաղրամյան 26»:

Լևոն Փանոսյան