Վերջին տարիներին բանակում զիվորների հիվանդացության ակնհայտ անկում է արձանագրվել

 Հայոց բանակում տարեցտարի բարելավվում է բուժսպասարկման որակը, կատարելագործվում են բուժսարքավորումները. բոլոր բուժկենտրոնները եւ զորամասերն ապահովված են որակյալ, արտոնագրված դեղորայքով: Այս մասին  «Արմենպրես»-ի թղթակցի հետ զրույցում ասաց ՀՀ ՊՆ ռազմ աբժշկական վարչության պետի տեղակալ Տիգրան Ավետիսյանը` ավելացնելով, որ եթե նախկինում զինծառայողները, նրանց ընտանիքի անդամները, զոհված ազատամարտիկների ընտանիքի անդամները ստացել են անվճար բուժօգնություն, ապա այսօր դրանց ավելացել են նաեւ թանկ արժեցող հետազոտությունները:

Տիգրան Ավետիսյանը նշեց, որ ՀՀ առողջապահության նախարարության հետ սերտ համագործակցության արդյունքում արդեն հասել են նրան, որ նորակոչիկներն անհրաժեշտ պատվաստումներն ստանում են քաղաքացիական պոլիկլինիկաներում` զորակոչից առաջ: Դրանից հետո, նախկին զորամասային պայմանների փոխարեն, տնային պայմաններում անցնում են հետպատվաստումային մի քանի օրը: «Վերջին տարիների վերոհիշյալ բարեփոխումների արդյունքում բանակում զիվորների շրջանում հիվանդացությունների թվի ակնհայտ անկում արձանագրվեց»,- ընդգծեց նա:  

ՀՀ ՊՆ ռազմաբժշկական վարչությունն այսօր ծնող-բանակ-հասարակություն կապն ամուր պահելու քաղաքականության շնորհիվ ծնողների բարձրացրած ցանկացած խնդրի դեպքում ընդունում է հարցերը, ընդառաջում, թեթեւակի գանգատների դեպքում անգամ ուղարկում հետազոտման` նպաստելով ծնողների շրջանում անհանգստությունների իսպառ վերացմանը:

«Մեր գերխնդիրներից է նաեւ, որպեսզի ծնողներն իրենց զավակների առողջության հարցում ունենան առավելագույն հանգստություն, վստահ լինեն, որ բանակում զորակոչից մինչեւ զորացրման օրը` հանձինս մասնագիտական բարձր կարողությունների տեր բժիշկների, իրենց զավակներն ապահով ձեռքներում են, իսկ զինվորիների առողջական խնդիրներն ուշադրության կենտրոնում: Ոչ մի զինվոր եւ ոչ մի վայրկյան աչքաթող չի լինում»,-ընդգծեց ռազմաբժշկական վարչության պետի տեղակալ Ավետիսյանը: