Ժա­մա­նակն իր ըն­թաց­քից դուրս է գա­լիս

Բնական է, որ իշխանափոխությունից հետո ՀՀ-ում նոր օրակարգ ու նոր տեսլականներ առաջ քաշվեցին, բնական է նաև այն, որ իշխանության ներսում աստիճանաբար առաջանում են կաստաներ, որոնք փորձում են իշխանության ներսում ունենալ սեփական հավատարիմների խումբը:

Այս երևույթը հիմնականում զարգանում է փաշինյանական թևի և քաղակտիվիստների կամ, այսպես կոչված, «սորոսականների» միջև: Հասարակական հատվածը, քաղաքացիական ակտիվիստները, մասնավորապես նրանք, որոնք սնվում են դրսից ֆինանսավորվող տարբեր հիմնադրամների միջոցով, բավականին սառը վերաբերմունք դրսևորեցին իշխանությունների կողմից փառաբանված «Քաղաքացու օր» կոչվածին: Նկատելի էր, որ վերջիններս հաճախ քողարկված կերպով դեմ էին արտահայտվում նորահայտ այս տոնին՝ փորձելով վարկաբեկել գաղափարը, սակայն խնդիրն այն է, որ ակտիվիստների կրավորական կեցվածքը վերջին շրջանում նրանց կողմից որդեգրված քաղաքականության բաղկացուցիչ մասն է։ Ակնհայտ է, որ «քաղակտիվիստների» և վարչապետի միջև բավականին լուրջ տարաձայնություններ կան, որոնք խուլ հակամարտությունից օր օրի վերածվում են չքողարկվող վեճի։ Եվ այդ հակամարտությունն աստիճանաբար սկսում է կրել բազմավեկտոր, բազմապրոֆիլ բնույթ։

«Սորոսյան» խմբի համար բաց հակամարտության մեկնարկի ուղղակի ազդակ եղավ իրենց թիմակից Դավիթ Սանասարյանի շուրջ ստեղծված իրավիճակը, երբ ակնհայտ դարձավ, որ Սանասարյանի անվան հետ առնչվող կոռուպցիոն էպոպեան զարգանում ու գեներացվում է երկրի քաղաքական ղեկավարության թողտվությամբ։ Սա վերջին կաթիլն էր, որը հիմք տվեց «սորոսականներին» արձակել ձեռքերը և բացահայտորեն մտնել մարտի դաշտ։

Առաջին բանը, որ սորոսականները փորձում են անել, վարչապետին իր առանց այն էլ սակավ հենարաններից զրկելն է. նախ և առաջ թիրախավորվում են ուժային կառույցները։ Խոսքն առաջին հերթին ԱԱԾ ղեկավար Արթուր Վանեցյանի մասին է, որը եթե ընդամենը մի քանի ամիս առաջ համարվում էր գրեթե ազգային հերոս, հեղափոխության ավանգարդ, պատկերավոր ասած՝ պատժող թուր, ապա այսօր նրան որոշակի անվստահություն են հայտնում՝ Սանասարյանի հետ կապված քրեական գործի վարույթը պահանջելով փոխանցել յուրայինին՝ ՀՔԾ պետ Սասուն Խաչատրյանին։ Ընդ որում, այդ պայքարը շատ ենթաշերտեր ունի, և գլխավոր գործող անձանց՝ Վանեցյանի և Սանասարյանի միջև շատ լուրջ լեզվակռիվ է ծավալվել։ Սանասարյանը նույնիսկ սպառնում է նոր պայքար սկսել՝ ինչ-որ առումով նույնիսկ վաբանկ գնալով։ Այս պատերազմը ծավալվում է նաև տեղեկատվական հարթակներում՝ իրեն բնորոշ դրսևորումներով, լրատվական արտահոսքերով և այլն։ Ամենայն հավանականությամբ, այսպես կոչված «սորոսականները» Վանեցյանի դեմ պայքարին առաջիկայում կհաղորդեն նաև բովանդակություն, ինչն էլ ավելի հետաքրքիր կդարձնի դեպքերի ընթացքը։

Ակնհայտ պայքար ակներև է նաև ոստիկանապետ Վալերիյ Օսիպյանի դեմ, ընդ որում՝ իշխանափոխության հենց առաջին օրից։ Այս առումով առաջնագծում «Սասնա ծռերն» են, որոնք նույնպես ասոցացվում են որոշ հիմնադրամների հետ։ Պատահական չէ, որ անգամ «փաշինյանական» դաշտի փորձագետները համարում են, որ վարչապետի մեծ սխալն էր «Սասնա ծռերի» նկատմամբ բարյացակամ վերաբերմունքը՝ համարելով այն դանդաղ գործողության ական կառավարության ղեկավարի տակ։ Իսկ բանակի նկատմամբ անվստահություն հայտնելը, գեներալներին պիտակավորելը, վարկաբեկելը վաղուց արդեն զարմանալի չէ, և հասարակական սեկտորի ներկայացուցիչները մեծ հաճույքով են ինքնահաստատվում այդ թեմաներում։

Հասարակական շարժումների անդամները թիրախավորում են նաև վարչապետի քաղաքական թիմը։ Այստեղ ակնհայտ է, որ նրանք այդ հիմքերն ունեն։ Այդ թիմն այս իշխանավարման ընթացքում ապացուցել է, որ թե՛ կադրային, թե՛ գիտելիքների, թե՛ ունակությունների առումով շատ հեռու է երկիրը ղեկավարելու կարողություններից։ Այնպես որ, առանձնապես մեծ ջանքեր էլ պետք չէ գործադրել. թիմն ինքն իրեն վաղուց վարկաբեկել է։ Եվ պարզ է, որ գործընթացները որքան թեժանան, այնքան հակամարտությունն ավելի ակնհայտ կլինի։

Ըստ էության՝ «սորոսյան» թևը փորձում է բոլոր ճակատներով հարվածի տակ պահել վարչապետին՝ թուլացնելով նրան ու առավել ամրապնդելով սեփական դիրքերը։ Պատեհ առիթի դեպքում չի բացառվում՝ իշխանափոխության նոր գործընթաց սկսեն։

Այսպիսով՝ Նիկոլ Փաշինյանի համար մեկնարկել է բավականին բարդ ժամանակաշրջան. չունի իր թիկունքն ամուր պահող քաղաքական կուռ կառույց, հենարաններ, փոխարենը նրա դեմ աշխատում են որոշակի ուժեր՝ ի դեմս կասկածելի հիմնադրամների։ ...Իսկ ժամանակը Հայաստանում աներևակայելի արագ է ընթանում. գրեթե ամեն օր ինչ-որ բան է փոխվում։

ԱՆԴՐԱՆԻԿ ՀԱՐՈՒԹՅՈՒՆՅԱՆ