Ու՞մ է իրականում պատկանում Պուտինին վերագրվող աղմկահարույց արտահայտությունը
ԲԼՈԳԳագիկ Համբարյանը ֆեյսբուքյան իր էջում գրում է.
Արդեն երկու օր է սոցիալական ցանցերը և մի շարք ԶԼՄ-ներ ողողված են «Ահաբեկիչներին ներելն Աստծո գործն է, իմ գործն է նրանց իր մոտ ուղարկելը» արտահայտությամբ, որը վերագրվում է ՌԴ նախագահ Վ.Պուտինին։ Առաջինն այս տեղեկությունը նոյեմբերի 17-ին հաղորդել էր ամերիկյան Fox News հետուստաընկերությունը, որը սակայն շատ արագ հերքվեց Huffington Post-ի կողմից։ Վերջինիս լրագրողներին հաջողվել էր պարզել, թե ով է իրականանում այս ապատեղեկատվության հեղինակը։ Դա՝ Russia Today հեռուստաընկերության լրագրող Ռեմի Մաալուֆն է, ով այն տպագրել է իր միկրոբլոգում, իսկ ապացույցներ, որ Պուտինն այդպիսի արտահայտություն է արել, չի ներկայացրել։ Սակայն ԶԼՄ-ներին դա շատ դուր է եկել, որի հետևանքով էլ այս երկու օրվա ընթացքում այն դարձել է սոցցանցերի գլխավոր «հիթ» և ամենամեկնաբանվող ցիտատ։
Իրականում այս արտահայտության հեղինակն է (մի փոքր այլ տարբերակով) հայտնի գանգստեր և մաֆիոզի, 20-րդ դարի սկզբի ամենահայտնի «լավ տղա» Ալֆոնս Գաբրիել Կապոնեն, ում բոլորը ճանաչում են որպես Ալ Կապոնե։ Ազգությամբ իտալացի և ԱՄՆ-ում բնկավող սույն «հանցագործը» մեծ սեր ու հագանք է վայելել ժողովրդի մոտ։ Նրան անվանում էին «Մեր ժամանակների Ռոբին Հուդ»։ Մեծ դեպրեսիայի (տնտեսական ճգնաժամ) տարիներին՝ 1929-33 թթ. նա Նյու Յորքում, Չիկագոյում և այլ ամերիկյան քաղաքներում բացում է բարեգործական ճաշարաններ և նույնիսկ օգնում է իրեն քննադատողներին։ Հենց այդ տարիներին էլ նա անընդհատ կրկնում էր. «Արդյո՞ք կարելի է ներել թշնամուն: Աստված կների։ Մեր գործն է նրանց հանդիպումը կազմակերպելը»։
Այսպիսով, կարելի է ասել, որ ՌԴ նախագահին վերագրվող արտահատությունը նրանից մոտ 85 տարի առաջ արել է Ալ Կապոնեն։ Իսկ մերօրյա ճարպիկ լրագրողն էլ այն ժամանակակից է դարձրել՝ հանցագործ բառը փոխարինելով ահաբեկիչ բառով և այն վերագրելով աշխարհի հզոր դեմքերից մեկին։