Ամուլսարի շահագործմանը կողմ է նաև անտառները հատելով բրիկետների արտադրություն հիմնած արցախցի պատգամավորը

ՎԵՐԼՈՒԾԱԿԱՆ 24 Օգոստոս, 2019 16:32

Ամուլսարի շուրջ ծավալված քննարկումներից մեկում բանախոսներից մեկը տեսակետ էր հայտնել, որ եթե հասարակությունը հարցին մոտենում է միայն էկոլոգիական խնդիրների տեսանկյունից, ապա պետք է նաև դեմ լինի, որ մեքենաները շահագործվեն, քանի որ արտանետված գազերը վնասում են էկոլոգիան, պետք է ատոմակայանի աշխատանքին էլ դեմ լինի, քանի որ այն ևս վնասակար ազդեցություն ունի բնության և էկոհամակարգի վրա:

Ուշագրավ է, որ գրեթե նույն միտքն է օրերս արտահատել Արցախի Ազգային ժողովի պատգամավոր «Ազատ Հայրենիք» կուսակցության անդամ, պետա-իրավական հարցերի մշտական հանձնաժողովի անդամ Ռոբերտ Ղահրամանյանը, որը նաև Արցախում բրիկետների արտադրությամբ զբաղվող ընկերության սեփականատերերից է:

Նրա կարծիքով, եթե Ամուլսարի շահագործմանը դեմ անձինք խոսում են էկոլոգիական խնդիրների մասին, ապա պետք է նաև հրաժարվեն ավտոմեքենա շահագործելուց:

Ըստ պատգամավորի ֆեյսբուքյան գրառման՝ «Մթնոլորտի աղտոտվածության 80 % այսպես ասած ապահովում են ավտոտրանսպորտային միջոցների շարժիչներից արտանետվող գազերը։ Արտանետված գազերն իրենց մեջ պարունակում են 280-ից ավել թունավոր նյութեր, որոնք անմիջական վտանգ են սպառնում մարդու առողջությանն ու շրջակա միջավայրին։ Ամենափոքր մեքենան օրվա ընթացքում արտանետում է մոտ 1 կգ այդպիսի նյութեր։ Հիմա ի՞նչ, սկսենք քննարկումներ ավտոտրանսպորտային միջոցների շահագործումն արգելելու մասին.... »:

Orer.am- ն ավելի վաղ ներկայացրել էր, թե ինչ սկզբունքով է աշխատում բիրկետների գործարանը, որը անտառներից թափոններ հավաքելու փոխարեն զբաղված է անտառի ծառերը հատելով:

Այսինքն՝ ստացվում է, ովքեր կողմ են անտառներն ու գետերն անխնա օգտագործելով շահույթ ստանալու երևույթի հետ, որի պատճառով տասնյակ տարիների ընթացքում աճած ծառեր են հատվում, իսկ ՀԷԿ-երի պատճառով գետեր ցամաքում, բնական է, խնդիր չեն տեսնի, որ Ամուլսարը ևս շահագործվի:

Նրանք, ովքեր այսրոպեական հարցեր լուծելն ավելի են կարևորում, որի պատճառով այսօր Հայաստանում և Արցախում արդեն իսկ բնապահպանական լուրջ խնդիրներ են առաջացել և տասնյակ հեկտարներով հողեր մնացել են առանց ջրի, ջրառատ գետերի մի մասն էլ թունավոր արտանետումների պատճառով զրկվել են ձկնապաշարներից, բնական է, որ խնդիր չեն տեսնի: Փաստորեն, նմանները նախընտրում են սեփական գրպանը, իսկ բնությանը հասցված վնասի հետևանքներն ու խնդիրները պատրաստ են թողնել ապագա սերունդներին նվեր:

Կարճ ասած, չնայած աշխարհն այսօր գնում է բոլորովին այլ ճանապարհով և փորձում է մեքենաների արտանետումների քանակը նվազեցնել հասցնելով զրոյի, բայց Հայաստանում դեռ մտածում են վատի ու վատթարի միջև ընտություն կատարելու մասին, և էկոհամակարգը վնասելով հարստացողները մեքենաների արտանետումների ու ատոմակայանի հարցերը նոր հանք շահագործելու հետ համեմատելով փորձում են ժողովրդին համոզել, թե ամեն ինչ կարգին է:

Սա նշանակում է, որ նրանք ոչ միայն չեն տեսնում սեփական երկրում առկա էկոլոգիական բազում խնդիրները, որոնց պատճառով շատ ու շատ մարդիկ տառապում են անբուժելի հիվանդությունից ու մահանում, այլև չեն մտածում սեփական երկրի ապագայի մասին, ինչն ավելի ցավալի է, քան կարելի է պատկերացնել:

Արմինե Գրիգորյան