Թուրքիայի անհաշվենկատ մարտահրավերը Ռուսաստանին
ԲԼՈԳԱրմեն Գևորգյանը Ֆեյսբուքյան իր էջում գրում է.
Թուրքական զինված ուժերի կողմից Սիրիայի տարածքով թռիչք իրականացնող ռուսական Սու – 24 ինքնաթիռը խոցելու դեպքին հաջորդող Թուրքիայի նախագահ Ռեչեփ Թայիփ Էրդողանի հայտարարություններն ու գործողությունները հստակ մատնացույց են անում այն իրողությունը, որ այս միջադեպը Թուրքիայի և իր դաշնակիցների կողմից Ռուսաստանին ռազմական գործողությունների մեջ ներքաշելու նպատակով նախապես մշակված սադրիչ գործողությունների հանգուցալուծումն էր. թուրքական զինուժը խոցում է ռուսական ռազմական ինքնաթիռը → Թուրքիայի նախագահն անմիջապես «հոխորտում է», որ իրենք են ոչնչացրել ինքնաթիռը → միջադեպը ռուսական կողմի հետ քննարկելու փոխարեն Թուրքիան դիմում է ՆԱՏՕ-ին → թուրքական հատուկ ծառայությունները շրջափակում են Ստամբուլում Ռուսաստանի հյուպատոսությունը → Թուրքիայի նախագահը հրավիրում է Անվտանգության խորհրդի նիստ → ԱՄՆ նախագահ Բարաք Օբաման, սատարելով իր դաշնակից Թուրքիային, հայտարարում է, որ «Թուրքիան իրավունք ունի պաշտպանել իր օդային սահմանները» → ՆԱՏՕ-ի գլխավոր քարտուղար Սթոլթենբերգն էլ հայտարարում է, որ «կառույցը գտնում է, որ ռուսաստանյան օդանավը խախտել է Թուրքիայի օդային տարածքը»:
Կանխամտածված սցենարն ու դաշնակցային ձեռագիրն ակնհայտ է:
Այսպիսով, Թուրքիան ու իր հյուսիսատլանտյան դաշնակիցները հստակ կերպով ցանկանում են սեղմել օղակը Ռուսաստանի շուրջ, ակամայից սրելով լարվածությունը տարածաշրջանում, կրկին անգամ շեղվելով իրենց կարևորագույն առաքելությունից` համատեղ ուժերով պայքարել մարդկության համար սպառնալիք դարձած Իսլամական պետության դեմ:
Կարծես թե թուրքական արկածախնդրության ու անհաշվենկատության շնորհիվ մարտահրավերն առ Ռուսաստան նետված է:
Վստահաբար, Ռուսաստանը կուլ չի տա այս վիրավորանքը, սակայն իր պատժիչ գործողություններում կլինի հավասարակշռված ու չափավոր, ինչը չի հանգեցնի տարածաշրջանում պատերազմական նոր զարգացումների: