Զբոսաշրջության ցուցահանդես Վարշավայում
ԲԼՈԳԼեհաստանի Հանրապետությունում Հայաստանի Հանրապետության արտակարգ և լիազոր դեսպան Էդգար Ղազարյանը Ֆեյսբուքյան իր էջում գրում է.
Հայկական մի շարք ընկերություններ մասնակցել են Վարշավայում տեղի ունեցած միջազգային զբոսաշրջության ցուցահանդեսին
2015 թվականի նոյեմբերի 26-ից 28-ը Վարշավայում, Լեհաստանի Տոնավաճառների և համաժողովների ցուցահանդեսային կենտրոնում անցկացվող միջազգային զբոսաշրջային մասնագիտացված «TT WARSAW» 23-րդ ցուցահանդեսին Հայաստանի Զարգացման հիմնադրամի ջանքերով հայկական երեք ընկերություններ («ԳԼՈՐԻԱ ԹՐԱՎԵԼ», «ՎՈՅԱԺ ԱՐՄԵՆԻԱ» և «ՆՈՒԵՎԱ ՎԻՍՏԱ») մասնակցել են մեկ միասնական «ARMENIA» տաղավարով: Ընդհանուր առմամբ միջազգային այդ հեղինակավոր ցուցահանդեսին մասնակցում են 45 երկրներ ներկայացնող ընկերությունները՝ հիմնականում երկրների ընդհանուր տաղավարներով: Ցուցահանդեսի այս տարվա գլխավոր հյուրը Պաղեստինն էր: Հատկանշական է, որ Հայաստանը ՛՛TT Warsaw 2015՛՛ ամենամյա միջազգային ցուցահանդեսին մասնակցում է առաջին անգամ:
Ցուցահանդեսին մասնակցող հայկական ընկերությունների ներկայացուցիչները ներկայացնում էին Հայաստանի տեսարժան վայրերը, զբոսաշրջային գրավչությունները, հյուրանոցները և զբոսաշրջային ուղղությունները: Նրանք հնարավորություն ունեցան գործնական հանդիպումներ ունենալ Լեհաստանի և այլ երկրների գործընկերների հետ, հաստատել գործնական կապեր և ձեռք բերել նոր գործընկերներ:
Ցուցահանդեսի բացման պաշտոնական արարողությանը մասնակցել, որից հետո հայկական տաղավար է այցելել նաև Լեհաստանում ՀՀ դեսպան Էդգար Ղազարյանը, որը հանդիպում և առանձնազրույց է ունեցել հայկական ընկերությունների ներկայացուցիչների հետ, տեղեկություններ տրամադրել Լեհաստանի զբոսաշրջային շուկայի, առկա ներուժի և դրա զարգացման, Հայաստանի և Լեհաստանի զբոսաշրջային ընկերությունների համագործակցության կարևոր ուղղությունների վերաբերյալ: