Գյումրու մինի կենդանաբանական այգու արջերը հնարավոր է տեղափոխվեն Ռումինիա

Գյումրու մինի կենդանաբանական այգու արջերը հնարավոր է տեղափոխվեն Ռումինիա: Մաշա և Միշա արջուկներին Ռումինիայի արջերի պահպանության և խնամքի համար նախատեսված հատուկ պահպանվող այգի տեղափոխելու ցանկություն հայտնել է  Libearty Bear Sanctuary  կենդանիների պաշտպանության ասոցիացիան: Արջերի պահպանման ու խնամքի այգին հատուկ գոտի է, որտեղ այժմ գտնվող կենդանիները բնակվում են բնական միջավայրում: Ինչպես «Արմենպրես»-ին տեղակացրեց կենդանաբանական այգու տնօրեն Ստեփան Վարդանյանը, արդեն համաձայնություն կա, սակայն  պաշտոնական պայմանագիր այս պահին դեռ չի կնքվել: «Նոյեմբերի 27-ին համաձայնության ենք եկել, սակայն պաշտոնապես ասել, որ սրանով հարցը լուծված է՝ չեմ կարող քանի դեռ պայմանագիր չկա: Այս պայմանագրի առկայության դեպքում արջերը կտեղափոխվեն 1 ամսվա ընթացքում: Նախատեսվում է, որ կազմակերպությունն ինքն է հոգալու կենդանիների տեղափոխման հետ կապված բոլոր հարցերը: Տեղափոխման հնարավորության դեպքում իմ առաջին պահանջը կենդանիներին չքնեցնելն է»,-փաստեց այգու տնօրենը:

Ստեփան Վարդանյանը եթե արջերի հարցը լուծվող է համարում, ապա առյուծների հարցն անլուծելի է: «Լրատվամիջոցների արձագանքից հետո տարբեր զանգեր եմ ունեցել,  այդ թվում նաև Մոսկվայից և Ռիգայից, սակայն բոլորը միայն հետաքրքրվել են ու կոնկրետ առաջարկություններ չեն եղել՝ հավանաբար տեղափոխման ծախսի հետ կապված»,-ավելացրեց տնօրենը:

Գյումրիում 2010 թվականից գործող մինի կենդանաբանական այգին այլևս չի կարող գոյատևել: Խնդիրը ոչ միայն  կերի հայթայթման հետ է կապված, այլ նաև ջրի ու  ձմեռային սեզոնին հատուկ հարմարությունների բացակայության: Խնդիրն այնքան լուրջ է, որ ստիպված ձմեռային սեզոնի համար ուղտին, լամային, կապիկներին, լուսաններին ու ջայլամին ժամանակավորապես պահ են տվել Արմավիրի գազանանոցում: Գյումրիում այս պահին շատ լուրջ է առյուծների՝ 7 տարեկան մայր առյուծի՝ Մերիի ու ձագերի՝ Զիտայի ու Գիտայի հարցը:

Արմենուհի Մխոյան