Գեղարքունիքում կհիմնվեն ջերմոցային առաջին տնտեսությունները

Գեղարքունիքի մարզի Սեւանի եւ Գավառի տարածաշրջաններում հիմնադրվող ջերմոցային առաջին տնտեսությունները կարող են ստեղծել հարյուրավոր աշխատատեղեր: Ինչպես  տեղեկացրեց Գեղարքունիքի մարզպետ Ռաֆիկ Գրիգորյանը, ջերմոցային տնտեսությունները հիմնվում են այս տարվա սեպտեմբերի 23-ին ՀՀ Նախագահ Սերժ Սարգսյան ի մոտ կայացած խորհրդակցության հանձնարարականների կատարման շրջանակներում:

«ՀՀ Նախագահ Սերժ Սարգսյանի մոտ կայացած խորհրդակցությունից հետո, որը նվիրված էր Գեղարքունիքի մարզի 2014 թվականի եւ 2015 թվականի առաջին կիսամյակի սոցիալ-տնտեսական իրավիճակի, առկա հիմնախնդիրների եւ զարգացման ծրագրերի քննարկմանը, մեր կողմից ստեղծված հանձնախումբն ուսումնասիրություններ է կատարել մարզի տարածքի համայնքներում եւ ընտրել այն հողատարածքները, որոնք նպաստավոր են ջերմոցային տնտեսությունների ստեղծման ու գործարկման համար: Արդեն հայտնի են ներդրողները, ինչպես նաեւ այն համայնքները, որտեղ կհիմնվեն առաջին երկու խոշոր ջերմոցային տնտեսությունները: 2016 թվականի գարնանից շինարարական աշխատանքները կմենկնարկեն Վարսերի եւ Նորատուսի վարչական տարածքների հողերում: Ջերմոցային տնտեսությունների գործարկման դեպքում մենք կունենանք հարյուրավոր նոր ու կայուն աշխատատեղեր: Հետագա տարիներին նմանատիպ տնտեսություններ կարող են ստեղծվել նաեւ մարզի մյուս տարածներում»,-հավաստեց Գեղարքունիքի մարզպետը:

Ջերմոցային տնտեսությունից բացի, Գեղարքունիքում զարգանում է նաև անասնապահության ոլորտը: Մարզի Աղբերք գյուղում` Վլադիկ Ծովյանի անասնապահական տնտեսությունում, արմատավորվում է անասանապահական անհետացած ճյուղերից մեկը` գոմեշաբուծությունը: Վլադիկ Ծովյանի հավաստմամբ` իր տնտեսությունում պահվող 10 գլուխ գոմեշները բացառիկ են ոչ միայն Աղբերք գյողի, այլ նաեւ Գեղարքունիքի մարզի մյուս բնակավայրերի համար: «Մի քանի տարի է, ինչ զբաղվում ենք գոմեշների խնամքով: Մեր տնտեսությունում պահում ենք 25 գլուխ կով, 50 գլուխ ոչխար, մի քանի ձի, որոնց կողքին տարեցտարի ավելացնում ենք գոմեշների գլխաքանակը: Դրանց բուծումը սկսել ենք մեկ-երկու գլխից, եւ այժմ վեց գլուխ մայր ու չորս հորթ ունենք: Մթերքի իրացման խնդիր չունենք, պահպանությունն էլ խնդրահարույց չէ: Գոմեշի տեսակը վերջին տասնամյակներում աստիճանաբար քչացել ու կանգնել էր վերացման շեմին»,-նշեց Վլադիկ Ծովյանը:

Գեղարքունիքի մարզի Ծաղկաշենի գյուղապետարանի տեղեկացմամբ` եւս 5 գլուխ գոմեշ բուծվում է Ծաղկաշենում` Կամո Խաչատրյանի տնտեսությունում, որը դարձայլ բացառիկ է Գավառի տարածաշրջանի անասնապահության համար: