Ոստիկանությունը «Նոր Հայաստան» նախաձեռնության երթի մասնակիցներին կոչ արեց չշեղվել երթուղուց

 «Նոր Հայաստան» նախաձեռնությունը Ազատության հրապարակում հավաք անցկացնելուց հետո դուրս եկավ երթի` «Ժառանգություն» կուսակցության նախագահ Րաֆֆի Հովհաննիսյանի գլխավորությամբ:«Արմենպրես»-ի փոխանցմամբ` մինչ հավաքի մասնակիցները դուրս կգային հրապարակից, ՀՀ ոստիկանության ներկայացուցիչը բարձրախոսի միջոցով հայտնեց, որ առկա է հատուկ երթուղի, որից շեղվելու դեպքում օրենքով սահմանված կարգով պ ատասխանատվություն կենթարկվեն երթի կազմակերպիչները:«Քաղաքապետարանի կողմից ի գիտություն է ընդունվել այսօր հրավիրված հավաքի ժամանակ երթի անցկացումը, որի համար սահմանված է համապատասխան երթուղի` Հյուսիսային պողոտա, Աբովյան փողոց, Հանրապետության հարապարակ, Ամիրյան փողոց, Մաշտոցի պողոտա, այնուհետև վերադարձ Ազտաության հրապարակ: Հետևաբար, երթուղու խախտումը կդիտվի որպես օրենքի խախտում»,-ասաց ոստիկանության ներկայացուցիչը` հորդորելով չշեղվել երթուղուց, հետևել օրենքին:

Ժամը 18:00-ին Ազատության հրապարակում մեկնարկած հանրահավաքին ելույթներով հանդես եկան քաղաքական, հասարակական գործիչներ: Նրանք կոչ էին անում չեղարկել սահմանադրական փոփոխությունների հանրաքվեն:

Դեկտեմբերի 1-ին «Նոր Հայաստան» նախաձեռնությունը հանրահավաք էր հրավիրել Ազատության հրապարակում, որից հետո հավաքի մասնակիցները փորձել են մոտենալ Մելիք-Ադամյան փողոցում գտնվող Հայաստանի Հանրապետական կուսակցության գրասենյակին, իսկ «Ժառանգություն» կուսակցության առաջնորդ Րաֆֆի Հովհաննիսյանը փորձել է ծաղիկներ դնել ՀՀԿ գրասենյակի մոտ, սակայն ոստիկաները պատ են կազմել և դա թույլ չեն տվել: «Նոր Հայաստան» նախաձեռնությունը հայտարարել է շուրջօրյա հավաքների մասին, նրանք նախատեսում են գիշերել Ազատության հրապարակում:

 Լուսանկարը`Ազատություն ռադիոկայանի