Օտար­ման գոր­ծարք­նե­րի ամե­նա­մեծ ցու­ցա­նի­շը՝ վեր­ջին տա­սը տա­րի­նե­րին.ի՞նչ է կա­տար­վում ան­շարժ գույ­քի շու­կա­յում

Անշարժ գույքի շուկայում, ինչպես կանխատեսվում էր դեռ նախորդ տարի, որոշակի փոփոխություններ են նկատվում: Խոսքը դեռ այս տարվա առաջին եռամսյակային տվյալների մասին է, թեպետ համավարակով պայմանավորված՝ հնարավոր ազդեցությունների մասին շուկայի մասնագետներն ու ներկայացուցիչներն արդեն իսկ որոշակի կանխատեսումներ ունեն: 

Մինչ այդ, համադրել ենք կադաստրի և վիճակագրական կոմիտեի պաշտոնական տվյալներն ու նկատել, որ ինչպես նախորդ տարվա, այնպես էլ 2020թ. առաջին եռամսյակում ամենաշատ գործարքների քանակով առաջին տեղում մայրաքաղաքն է. 2020թ. առաջին եռամսյակում Երևանում 13 550 գործարք է եղել: Ամենաքիչ՝ թվով 930 գործարքները Վայոց ձորում են եղել:

Ընդհանուր առմամբ, 2020 թվականի առաջին եռամսյակում հանրապետությունում գրանցված անշարժ գույքի գործարքների քանակը 2019թ. առաջին եռամսյակի համեմատ աճել է 13,5 տոկոսով:

Դիտարկելով գործարքների առանձին տեսակները՝ նկատենք, որ 2020թ. առաջին եռամսյակում ամենաշատը օտարման, ամենաքիչը՝օրինականացման գործարք է կատարվել. 2020 թ. առաջին եռամսյակում օտարման 16 376 գործարք է եղել: 

Նախորդ տարվա նույն ժամանակահատվածի համեմատ օտարման գործարքներն ավելացել են 2056-ով, մինչդեռ 2019թ.-ի նույն ժամանակահատվածում օտարման 14320 գործարք էր եղել: 

Նախորդ տարվա առաջին եռամսյակի համեմատ ավելացել են նաև վարձակալության գործարքները՝ նախորդ տարվա 2422-ի փոխարեն դառնալով 3600: Ավելացել են նաև օրինականացման, ժառանգության գործարքները: Զուգահեռ, սակայն, 209-ով նվազել են գրավադրման գործարքները:

 

 

Նկատենք, որ օտարման վերոնշյալ 16 376 գործարքներից առուվաճառքի գործարքների թիվը կազմել է 12 049, նվիրատվությանը՝ 3999, փոխանակմանը՝ 48 գործարք: Կան նաև օտարման այլ տեսակներով պայմանավորված գործարքներ, որոնց թիվը 287 է: 

Հավելենք, որ 2010 թվականից ի վեր 2020թ. առաջին եռամսյակում օտարման գործարքների ամենամեծ թիվն է գրանցվել:

 Այս գործարքների ամենաբարձր ցուցանիշը գրանցվել է մայրաքաղաքում՝ կազմելով 31,5 տոկոս, ամենաքիչը՝ Վայոց ձորում: Ընդհանուր առմամբ, նախորդ տարվա նույն ժամանակահատվածի համեմատ օտարման գործարքներն ավելացել են 14,4 տոկոսով:

 

Եթե ուսումնասիրում ենք ընդհանուր գործարքների տոկոսային բաշխվածությունը՝ ըստ գույքի տեսակների, նկատում ենք, որ ամենաշատ գործարքները կապված են հողերի հետ: Հողերի գործարքների տոկոսային բաշխվածությունը կազմել է 37 տոկոս, բնակարաններինը՝ 27,5 տոկոս: 

Բնակելի տների գործարքները կազմել են 22,3, ավտոտնակներինը՝ 2,9, հասարակական նշանակության շինություններինը՝ 8,1 տոկոս, իսկ գործարքների ամենացածր ցուցանիշը բաժին է ընկել արտադրական նշանակության շինություններին:

Այդուհանդերձ, վերոնշյալ գրեթե բոլոր տեսակներով պայմանավորված գործարքները 2019թ. առաջին եռամսյակի համեմատ ավելացել են: Բացառություն են միայն ավտոտնակների գործարքները: 

Նախորդ տարվա առաջին եռամսյակի համեմատ ավտոտնակների գործարքները նվազել են 6,1 տոկոսով: 2019թ. նշված ժամանակահատվածի համեմատ 3,2 տոկոսով ավելացել են բնակարանների գործարքները, առանձնատներինը՝ 17, 8 տոկոսով, արտադրական նշանակության շինություններինը՝ 21,5, հասարակական նշանակության շինություններինը՝ 17,5-ով:

Ընդհանուր առմամբ, 2020թ. առաջին եռամսյակում Հայաստանում գրանցվել է անշարժ գույքի առուվաճառքի 12 049 գործարք: Նախորդ տարվա համեմատ այս ցուցանիշն ավելացել է 17,7 տոկոսով: Ինչպես օտարման, առուվաճառքի դեպքում ևս ամենաբարձր ցուցանիշը բաժին է ընկել հողերի գործարքներին, ամենացածրն այս դեպքում կրկին արտադրական նշանակության շինություններինն է:

Անդրադառնանք անշարժ գույքի գործարքներին՝ դրանք գնելու և վաճառելու տեսանկյունից: 2020 թվականի առաջին եռամսյակում իրավաբանական անձանց կողմից գնված բնակարանների թիվը նախորդ տարվա համեմատ նվազել է 24,4 տոկոսով: 

Ի տարբերություն գնվածների, վաճառվածների թիվն ավելացել է: Բնակարանների վաճառքով պայմանավորված գործարքներն ավելացել են 44, 3 տոկոսով: 

Առանձնատների գնման գործարքներն ավելացել են 2 անգամ, բայց վաճառքը նվազել է 35, 6 տոկոսով, հող վաճառելու գործարքներն էլ ավելացել են 2,1 տոկոսով: Իսկ ավտոտնակների միայն վաճառքը նախորդ տարվա առաջին եռամսյակի համեմատ նվազել է 50,5 տոկոսով: 

Անշարժ գույքի շուկայում առկա են նաև գնային փոփոխություններ: 2020 թվականի առաջին եռամսյակում մայրաքաղաքում բազմաբնակարանային շենքերի բնակարանների շուկայական միջին գները 2019թ. առաջին եռամսյակի համեմատ աճել են 12,1 տոկոսով: Վերլուծությունը 1 քառակուսի մետր մակերեսի հաշվարկով է արվել: Մարզերի քաղաքներում բազմաբնակարան շենքերի բնակարանների գները ևս բարձրացել են՝ 2019 առաջին եռամսյակի համեմատ աճելով 6,6 տոկոսով:

ԱՆՆԱ ԲԱԴԱԼՅԱՆ