«Հայավտոկայարանը» հանել պետգույքի մասնավորեցման ցանկից. նախագիծ

Պետական գույքի կառավարման կոմիտեն հանրային քննարկման է ներկայացրել նախագիծ, որով առաջարկում է փոփոխություն կատարել «Պետգույքի մասնավորեցման 20172020 թվականների ծրագրի մասին» օրենքում, մասնավորապես առաջարկվում է մասնավորեցման օբյեկտների ցանկից հանել «Հայավտոկայարան» ՓԲԸ-ն:

Կոմիտեն նախագծի հիմնավորման մեջ նշել է, որ դրա ընդունումը բխում է կառավարության 2020 թվականի ապրիլի 2-ի թիվ 439-Ա որոշման 4-րդ կետով տրված հանձնարարականի կատարման անհրաժեշտությունից:

«Փաստն» ավելի վաղ անդրադարձել էր տարածքային կառավարման և ենթակառուցվածքների նախարարության ներկայացրած նախագծին, որի նպատակն է բարձրացնել հանրապետությունում ներպետական կանոնավոր ուղևորափոխադրումների որակը: 

Այդ առումով անհրաժեշտություն էր առաջացել վերանայելու մրցույթների մասնակցության պայմանները, գնահատման չափորոշիչները և երթուղիների սպասարկման տրամադրվող ժամկետները: Բացի դա, նախարարությունը ներկայումս հանրապետության տարածքում ներդնում է միասնական երթուղային ցանց, որի արդյունքում բոլոր համայնքները կապահովվեն որակյալ, արդյունավետ և հասանելի տրանսպորտային սպասարկմամբ, կներդրվի միասնական տոմսավորման համակարգ և ինտերակտիվ քարտեզ: 

Նշվում է, որ կանոնավոր ուղևորափոխադրումների կարևոր բաղկացուցիչ մաս է կազմում ավտոկայարանային ծառայությունների մատուցումը, որը Հայաստանում իրականացնում է «Հայավտոկայարան» ՓԲԸ-ն: 

Ընկերությունն իր գործառույթներն իրականացնում է իր կազմում գործող չորս ավտոկայարանների՝ Երևանի «Կենտրոնական» և «Հյուսիսային», Գյումրիի և Վանաձորի ավտոկայարանների, ինչպես նաև մյուս քաղաքներում տեղակայված 24 ավտոկայանների և 17 երթակարգավարական կետերի միջոցով:

Ուղևորափոխադրումների սպասարկման պատշաճ որակ ապահովելու տեսանկյունից անհրաժեշտություն է առաջանում բարձրացնել նաև ավտոկայարանային ծառայությունների որակը, հանրապետության տարածքում գործող բոլոր ավտոկայարաններում և ավտոկայաններում ապահովելով կառավարության 2007 թվականի դեկտեմբերի 27-ի թիվ 1604-Ն որոշմամբ հաստատված ավտոկայարանային գործունեության կազմակերպման կարգով սահմանված պահանջները:

Ավտոկայարանային համակարգի արդիականացումը պետք է իրականացվի ներդրումային ծրագրերի միջոցով, այդ թվում նաև կառավարության օժանդակությամբ: Հետևաբար անհրաժեշտ է պահպանել ընկերության ամբողջականությունը (ներառյալ գույքային) և պետական կարգավիճակով գործունեությունը` բաժնետոմսերի 100 տոկոս պետական սեփականությունը: 

Ներդրումային ծրագրերը հնարավորություն կտան համակարգային մոտեցում ցուցաբերել երկրի բոլոր քաղաքներում տեղակայված ավտոկայարանների և ավտոկայանների վերանորոգման, վերակառուցման, անհրաժեշտության դեպքում նաև ավտոկայանների օպտիմալացման և նոր ավտոկայանների կառուցման գործընթացում:

Բացի դա, հաշվի առնելով այն, որ «Ավտոմոբիլային տրանսպորտի մասին» օրենքի 10-րդ հոդվածի համաձայն միջպետական, միջմարզային և ներմարզային ավտոբուսային կանոնավոր փոխադրումների երթուղային ցանցերը կազմակերպում է տարածքային կառավարման և ենթակառուցվածքների նախարարությունը, ուստի որոշման 1-ին կետով սահմանվել է, որ «Հայավտոկայարան» ՓԲԸ-ի պետական սեփականություն հանդիսացող բաժնետոմսերի կառավարման լիազորությունները վերապահել տարածքային կառավարման և ենթակառուցվածքների նախարարությանը: 

Պետգույքի կառավարման կոմիտեն ընդգծում է, որ ներդրումային ծրագրերի ներգրավմամբ, այդ թվում նաև կառավարության օժանդակությամբ կիրականացվեն ավտոկայարանային համակարգի բարեփոխումներ, արդյունքում կբարձրանա մատուցվող ավտոկայարանային ծառայությունների որակը, և միջպետական ու ներհանրապետական ուղևորափոխադրումների կազմակերպումը կդառնա առավել արդյունավետ:

Ակնկալվում է, որ նախագիծն ընդունելու արդյունքում «Հայավտոկայարանի» կառավարումն ու գործունեությունն ավելի արդյունավետ կլինի, ինչպես նաև հետագայում կստեղծվեն պայմաններ դրա զարգացման համար: Բացի դա, այս պարագայում պետությունն ուղիղ ներգրավված կլինի տրանսպորտի ոլորտում կարևոր գործառույթներ իրականացնող մարմնի կառավարման համակարգում:

ԼՈՒՍԻՆԵ ԱՌԱՔԵԼՅԱՆ