2019-ին կեն­դա­նա­բա­նա­կան այ­գում 70 կեն­դա­նի է ան­կել, բայց գլխա­քա­նակն ավե­լա­ցել է, տե­սակ­նե­րը՝ հա­մալր­վել

Նախորդ տարի կենդանաբանական այգու գործունեությունը շատ քննարկվեց, եղան նաև սկանդալներ: Թեև այգին հայտնվել էր կիզակետում, այնուամենայնիվ, օրերս հրապարակված վիճակագրական տվյալների համաձայն՝ կան մի շարք խոսուն փաստեր, որոնք վկայում են դրական արդյունքների մասին:

 Խոսքը վիճակագրական կոմիտեի կողմից հրապարակված ցուցանիշների մասին է, որտեղ առանձին անդրադարձ կա նաև կենդանաբանական այգու գործունեության, կենդանիների տեսակների, գլխաքանակի, ինչպես նաև ծնված, ձեռք բերված, անկում ապրած կենդանիների մասով: Հիմք ընդունելով 2019 թ. գործունեության վերաբերյալ հրապարակված ցուցանիշները՝ մենք դրանք համեմատել ենք 2018 թ. տվյալների հետ:

Բայց մինչ այդ դիտարկենք կենդանաբանական այգու գործունեության 2019 թվականին առնչվող հատվածը: Ցուցադրման ենթակա կենդանիների տեսակային կազմն ու գլխաքանակը պատկերող թվային սանդղակում առկա տվյալներից տեղեկանում ենք, որ 2019 թվականի տարեվերջին առկա է եղել կենդանիների 182 տեսակ, որոնց գլխաքանակը կազմել է 910:

Նկատենք, որ նշված 182 տեսակներից 14-ը գրանցված են Հայաստանի կարմիր գրքում, իսկ 81-ը՝ բնության պահպանության միջազգային միության Կարմիր ցուցակում: 182 տեսակների մեջ ամենամեծ բաժինը կազմում են թռչունները: 

2019 թ. տվյալներով՝ կենդանաբանական այգում թռչունների 49 տեսակ կա: Տեսակով ամենաքիչը երկկենցաղներն են:

Ինչ վերաբերում է գլխաքանակին, ապա այս առումով ամենաշատը ձկներն են, որոնց թիվը 317 է: Գլխաքանակով երկրորդ տեղում թռչուններն են, որոնց քանակը 248 է: 

Դիտարկենք նաև ցուցադրման ենթակա կենդանիների քանակական շարժը, որն առկա է եղել տարեվերջին: Առանձնացնելով կենդանիների մի շարք տեսակներ՝ նշենք, որ 2019 թվականին անկում է ապրել 1 տեսակի երկկենցաղ, նոր ծնվածներ այս խմբում չկան:

Զուգահեռ՝ ձեռք է բերվել սողունների 17 տեսակ: Ծնվել է նաև 18 սմբակավոր, անկել՝ 9-ը: 2019 թ.-ին 20 կաթնասուն է ծնվել, անկել են 18-ը: Անողնաշար կենդանիներ ո՛չ ծնվել են, ո՛չ անկել, փոխարենը ձեռք է բերվել կաթնասունների թվով 47 գլխաքանակ:

Անկում ապրած 9 տեսակի ձկների քանակը 29 է, իսկ թռչունների քանակը՝ 15: 2019ին ձեռք բերված կենդանիների ամենամեծ տեսակարար կշիռը ձկներինն է՝ 27 տեսակի 131 ձուկ է ձեռք բերվել: Այս առումով էլ են երկրորդ տեղում թռչունները. 2019 թ.-ին 25 տեսակի 62 թռչուն է ձեռք բերվել:

Ընդհանուր առմամբ, 2019 թվականին ծնված կենդանիների գլխաքանակը 30 է եղել, որոնց թվում 7 տեսակի կենդանիներ կան: 

Նշված ժամանակահատվածում ձեռք է բերվել 91 տեսակի 281 կենդանի: Միևնույն ժամանակ, 2019 թ.-ին կենդանաբանական այգում 27 տեսակի 70 կենդանի է անկել:

Երբ վերոնշյալ տվյալները համեմատում ենք 2018 թ. նույն ժամանակահատվածի ցուցանիշների հետ, նկատում ենք, որ 2018 թ. տարեվերջին կենդանիների տեսակների քանակը եղել է 125, գլխաքանակը՝ 720, որոնցից 143-ը գրանցված են եղել ՀՀ Կարմիր գրքում, իսկ 378-ը՝ Բնության պահպանության միջազգային միության Կարմիր ցուցակում: 

Այս թվերը վկայում են, որ ի տարբերություն 2018-ի, կենդանիների գլխաքանակը 2019 թ.-ին ավելացել է 190-ով, իսկ տեսակները՝ 57-ով:

Նկատենք, որ ինչպես 2019թ.-ին, այնպես էլ 2018-ին, ի տարբերություն մյուս կենդանիների գլխաքանակների, ձկների ու թռչունների քանակն ավելի շատ է եղել:

Ինչ վերաբերում է ցուցադրման ենթակա կենդանիների քանակական շարժի արդեն 2018-2019թթ. համեմատական ցուցանիշներին, նկատենք, որ 2019 թ.-ի համեմատ ծնված կենդանիների քանակը 2018 թ.-ին ավելի շատ է եղել: Եթե 2019 թ.-ին այդ թիվը 30 էր, ապա 2018 թ.-ին այն եղել է 41:

Ի տարբերություն 2019 թ.-ի, ծնված կենդանիների ընդհանուր գլխաքանակը 2018 թ.-ին կազմել է 41: Այսինքն, 11-ով ավելի շատ, քան անցած տարի: 

Ձեռք բերված կենդանիների գլխաքանակը 2018 թ.-ին 49 է եղել՝ 232-ով ավելի քիչ, քան 2019 թ.-ին: 2018 թ.-ին 120 կենդանի է անկել: Հաշվի առնելով, որ 2019 թ.-ին անկման 70 դեպք էր արձանագրվել, ստացվում է՝ 2019թ.-ին այդ ցուցանիշը 50-ով նվազել է: Հավելենք նաև, որ պաշտոնական տվյալներով, 2019 թ.-ին կենդանաբանական այգու այցելուների թիվն ավելացել է 30 977-ով:

ԱՆՆԱ ԲԱԴԱԼՅԱՆ