Հանրաքվեի գանձանակն այդպես էլ դատարկ մնաց

Հանրաքվեի քարոզչության ֆինանսավորման համար այդպես էլ որևէ հիմնադրամ չբացվեց: Այս մասին Past.am-ը պարզեց ԿԸՀ-ի պաշտոնական կայքի համապատասխան հավելվածից:

Նկատենք, որ հանրաքվեի քարոզարշավը մեկնարկել է հոկտեմբերի 10-ից, այսինքն՝ օրենքը թույլ է տալիս բացել հիմնադրամներ այդ օրվանից սկսած: Հավելենք, որ հանրաքվեի քարոզչության ֆինանսավորման հիմնադրամներ պետք է բացվեին ՀՀ Կենտրոնական բանկում, սակայն որևէ քաղաքական ուժ կամ անհատ մուծում այդպես էլ չի կատարել: Չնայած դրան` Սահմանադրության փոփոխությունների հանրաքվեի նախապատրաստման և անցկացման համար պետական բյուջեից հատկացվել էր մոտ 1.8 միլիարդ դրամ։

Հիշեցնենք, որ հանրաքվեի մասին օրենքի համաձայն՝ հանրաքվեի քարոզչության համար նախատեսված հիմնադրամում մուծումներ կատարելու իրավունք չունեն պետական և տեղական ինքնակառավարման մարմինները, բյուջետային հիմնարկները (կազմակերպությունները), օտարերկրյա ֆիզիկական և իրավաբանական անձինք, քաղաքացիություն չունեցող անձինք, բարեգործական, կրոնական, միջազգային կազմակերպությունները և միջազգային հասարակական շարժումները: Բացի այդ` հիմնադրամի հաշվում կատարված մուծումների ընդհանուր գումարը չպետք է գերազանցի Հայաստանի Հանրապետությունում հաշվարկային հիմք հանդիսացող նվազագույն աշխատավարձի 10000-ապատիկը:

Հիշեցնենք, որ հաշվարկային հիմք հանդիսացող նվազագույն աշխատավարձը հաշվարկվում է 1000 դրամի, այլ ոչ թե իրական նվազագույն աշխատավարձի չափով, այսինքն՝ հիմնադրամում ընդհանուր գումարը չպետք է գերազանցի 10 մլն դրամը:

Լիլիթ Լալայան