Ես Երևանում նստած՝ ի՞նչ իմանամ. Արտաշես Գեղամյանը «ցրեց» ռուսական ԶԼՄ-ների մասին հարցը

Այս օրերին Երևանում տեղի ունեցող ընդդեմ էլեկտրաէներգիայի թանկացման բողոքի զանգվածային միջոցառումները ռուսական լրատվամիջոցները ներկայացնում են հայ-ռուսական հարաբերությունների համատեքստում:

Նույնիսկ համեմատականներ են անում Կիևի Մայդանի հետ: Ռուսական առաջին ալիքը հետևյալ կերպ է մեկնաբանել տեղի ունեցածը. «Չարտոնված հանրահավաքի ձևական պատճառը օգոստոսի 1-ից էլեկտրաէներգիայի սակագնի թանկացման մասին կառավարության որոշումն էր: Այս փաստից օգտվեց ընդդիմությունը, որը Երևանում մի քանի նստացույց կազմակերպեց»։

Рен ТВ-ի լրագրողը մասնավորապես ասում է. «Երևանի գլխավոր պողոտայում քիչ էր մնում կրկնվեր կիևյան Մայդանը: Ոստիկանները ցրեցին էլեկտրաէներգիայի սակագնի բարձրացման դեմ բողոքող 5 հազար ցուցարարներին: Իշխանությունները փորձում են հասկանալ` ով էր վճարել այս նոր հեղափոխության փորձի համար»։

Россия 24-ի և այլ լրատվամիջոցների ռեպորտաժներում, երևանյան ակցիաների հետ կապված, Արևմուտքի հետքեր և ֆինասավորում են տեսնում, որը գուցե կարող է ուղղվել ընդդեմ Ռուսաստանի:

Ռուսական գծի հերոսաբար պաշտպանող Արտաշես Գեղամյանը «ցրեց» Past.am-ի հարցը՝ ինչո՞ւ են ռուսական մեդիաները նման կերպ ներկայացնում իրավիճակը:

Նա նշեց. «Ավելի լավ է՝ այդ հարցով դիմեք ռուսական լրատվամիջոցներն: Ես Երևանում նստած՝ ի՞նչ իմանամ»:

Լևոն Փանոսյան