Չեխիայի և Հայաստանի միջև շատ մեծ ներուժ կա, որը դեռ օգտագործված չէ. Չեխիայի արտգործնախարար

 

ՀՀ արտգործնախարար Էդվարդ Նալբանդյանն ու Չեխիայի արտգործնախարար Լյուբոմիր Զաորալեկն այսօր տեղի ունեցած երկկողմ հանդիպումից հետո համատեղ մամուլի ասուլիս ունեցան, որի ընթացքում Էդվարդ Նալբանդյանը հայտարարեց, որ երկկողմ հարաբերությունների հագեցած օրակարգի մասին են եղել քննարկումները:

«Երկուստեք կարևորվեցին քաղաքական երկխոսության, միջխորհրդարանական կապերի բարձր մակարդակի այցելությունները, տնտեսական համագործակցությունը և մի շարք այլ հարցեր»,-ասաց ՀՀ արտգործնախարարը՝ հավելելով, թե կարող են նշել, որ Հայաստանի և Չեխիայի հարաբերությունները գտնվում են բարձր մակարդակի վրա:

Էդվարդ Նալբանդյանն ասաց նաև, որ իր չեխ գործընկերոջն է ներկայացրել ղարաբաղյան հակամարտության կարգավորման ուղղությամբ Մինսկի խմբի կարգավորման ջանքերը:

Լյուբոմիր Զաորալեկն իր հերթին ասաց, թե Չեխիայի Հանրապետությունը համարում է, որ Հայաստանը շատ լավ բարեկամ և գործընկեր է:

«Մեր հարաբերությունները վերջին տարիներին ինտենսիվորեն զարգանում են: Երկու կողմերում շատ մեծ ներուժ կա, որը դեռևս օգտագործված չէ: Գիտեմ, որ բազմաթիվ գործարարներ և ձեռնարկություններ կան, որոնք պատրաստ ենք ինչ-որ բան սկսել ձեր երկրում: Շատ ուրախ եմ, որ ձեր երկիրը նույնպես շահագրգռված է Չեխիայի և ԵՄ-ի հետ հարաբերություններով»,- ասաց Չեխիայի արտգործնախարարը:

Նա նաև ողջունեց վիզաների հետագա ազատականացման շուրջ երկխոսության բացումը:

 

 

X