Ինչ խորամանկությունների են դիմում խանութները, որպեսզի գնորդներն ավելի շատ ծախսեն

Շատ քչերն են, որ չեն գայթակղվում նախաամանորյա գնումներով, հատկապես, երբ ամենուր զեղչեր են։ Հենց դրանից էլ օգտվում են խանութներն ու մի շարք խորամանկ հնարքներ կիրառում, որպեսզի գնորդը հնարավորինս շատ ծախսի իրենց խանութում։ Ու թեեւ մեզ թվում է, թե կարողացանք գումար խնայել զեղչերի հաշվին, այնինչ իրականում մենք շատ ավելի շատ ենք ծախսում։ Past.am-ը ներկայացնում է այդ հնարքներից մի քանիսը:

Երեք ապրանք երկուսի գնով

Սա հեշտ, բայց գործող մեթոդ է։ 3 ապրանք 2-ի գնով են դնում, սակայն այդ ակցիայից առաջ նույն այդ մեկ ապրանքի գինը զգալիորեն բարձրացնում են։ Արդյունքում ոչ մի խնայողություն էլ չեք անում։ Մտնում եք խանութ, եւ աշխատողը ձեզ հայտնում է, որ միայն հիմա՝ այդ պահին ինչ-որ ապրանքի վրա, օրինակ, 30 տոկոս զեղչ է։ Հաճախորդի վրա աներեւակայելիորեն ազդում է այդ «միայն հիմա, հատուկ զեղչ» արտահայտությունը։ Եւ անգամ եթե տվյալ ապրանքը ձեզ շտապ պետք չէր՝ գնում եք։ Ի դեպ, նման վաճառքի են հանում սովորաբար չվաճառվող ապրանքները։

Պիտակներ

Դուք վերցնում եք մի տուփ ու նայում գինը՝ ինչ-որ գումար։ Թվում է, որ բավական թանկ է։ Սակայն հանկարծ նկատում եք, որ նոր պիտակի տակից հին պիտակն է երեւում, որի վրա շատ ավելի թանկ գին է նշված։ Անմիջապես մտածում եք՝ ահա, բախտս բերեց, ու անմիջապես գնում եք այն։ Այնինչ, դա պարզապես հնարք էր, եւ այդ ապրանքը հենց սկզբից էլ նշյալ գինն է ունեցել։

Զեղչեր կոնկրետ տեսականու վրա

Մտնում եք խանութ եւ տեսնում, որ մեծ տառերով գրված է՝ զեղչ 40 տոկոս։ Վերցնում եք ձեր ուզած ապրանքը, գնում, դուրս գալիս՝ մտածելով, որ արդեն զեղչված ապրանք գնեցիք։ Հետո պարզվում է, որ այդ 40 տոկոս զեղչը միայն կոնկրետ նշված տեսականու վրա էր, սակայն դուք չգիտեիք այդ մասին։

Երկվորյակ-ապրանքներ

Հատկապես կենցաղային տեխնիկայի խանութում կամ մեծ սուպերմարկետներում դրված են երկու իրար նման տուփեր՝ տարբեր գներով։ Սովորաբար գինը շատ չի տարբերվում։ Վերցնում եք էժանը, հերթ կանգնում, հասնում դրամարկղին, ու պարզվում է, որ թանկն եք վերցրել։ Շատ քչերն են, որ կարող են ժամանակ գտնել, կրկին այդքան հերթ կանգնել՝ հետ գնալուց ու իբր մյուս տուփը վերցնելուց հետո։

Ով չհասցրեց, ուշացավ

Սա հայտնի հնարք է։ Այն հիմանկանում կիրառում են կենցաղային տեխնիկայի խանութները։ Որեւէ կոնկրետ ապրանքանիշի կոնկրետ ապրանքի վրա զեղչ է հայտարարվում։ Սակայն երբ խանութ եք գնում, վաճառողն ասում է, որ կոնկրետ այդ ապրանքանիշի ապրանքը ավարտվեց, դուք չհասցրիք, սակայն կարող է նույն ապրանքի այլ ապրանքանիշին առաջարկել, որը կրկին զեղչվածի գինն ունի։ Եւ ստացվում է, որ դուք գնում եք ապրանք, որը միշտ էլ այդ գինն ուներ, պարզապես խաբվեցիք հնարքին։

Միշտ հիշեք

Խանութները հաճախ հայտարարում են, որ զեղչված ապրանքը հետ վերադարձնել չի կարելի։ Հիշեք, որ դա օրենքի խախտում է, բոլոր ապրանքներն էլ կարող եք վերադարձնել՝ կոնկրետ օրերի ընթացքում։ Այն ապրանքները, որոնցից խանութը ցանկանում է շուտ ազատվել՝ չի վաճառվում, ժամկետն է մոտենում պահպանման եւ այլն, դրվում միշտ այն դարակների վրա, որոնք հենց ձեր աչքի առաջ են։ Նայեք ներքեւի դարակներին, այնտեղի ապրանքն ավելի լավն է։