Ադրբեջանը կարող է խաղաղության պայմանագիր ստորագրել Հայաստանի հետ` ինքնիշխանության և սահմանների անձեռնմխելիության փոխադարձ ճանաչման դեպքում. Բայրամով

Ադրբեջանի արտաքին գործերի նախարար Ջեյհուն Բայրամովը Հայաստանի հետ խաղաղության պայմանագրի կնքումը հնարավոր է համարում ինքնիշխանության և սահմանների անձեռնմխելիության փոխադարձ ճանաչման դեպքում:

Բայրամովն այս կարծիքը հայտնել է երեքշաբթի օրը՝ ելույթ ունենալով Վիեննայում ԵԱՀԿ Մշտական ​​խորհրդի հատուկ նիստում, հայտնում է Ադրբեջանի ԱԳՆ մամուլի ծառայությունը:

Ադբեջանի արտաքին գործերի նախարարի խոսքով՝ «Ղարաբաղի դեօկուպացիան պայմաններ է ստեղծում Ադրբեջանի եւ Հայաստանի միջեւ հարաբերությունների կարգավորման համար»:

«Նախարարն իր ելույթում անդրադարձավ Ղարաբաղի վերականգնման և վերաինտեգրման թեմային` նշելով, որ Ադրբեջանն այս ուղղությամբ կշարունակի համագործակցությունը ԵԱՀԿ գործադիր կառույցների հետ: Ղարաբաղյան հակամարտության կարգավորումը տարածաշրջանում խաղաղության, անվտանգության և համագործակցության նոր հեռանկարներ է ստեղծել, և ԵԱՀԿ-ն կարող է իր ներդրումն ունենալ այս գործընթացում», - ասված է Ադրբեջանի արտգործնախարարության տարածած հաղորդագրությունում:

Ադրբեջանի արտաքին գործերի նախարարությունը նշում է, որ Խորհրդի նիստում ընդգծվել է, որ տարածաշրջանում տրանսպորտային և տնտեսական հաղորդակցությունների ապաշրջափակումն առանձնահատուկ նշանակություն ունի: Բացի այդ, հանդիպման մասնակիցները շեշտել են ադրբեջանա-հայկական սահմանին առկա լարվածությունը բանակցությունների միջոցով լուծելու անհրաժեշտությունը: