Հայաստանը շահագրգիռ է նոր պայմաններում շարունակել հայ-վրացական հարաբերությունները. Սերժ Սարգսյան

ՀՀ նախագահ Սերժ Սարգսյանն այսօր ընդունել է Վրաստանի արդարադատության ու պատիժների կատարման եւ պրոբացիայի նախարարներ Թեա Ծուլուկիանիին եւ Գիորգի Մղեբրիշվիլիին:

Նախագահը ողջունել է հյուրերին եւ նրանց մասնակցությամբ Երեւանում կայացած հայ-վրացական իրավական համագործակցության առաջին ֆորումը: Գոհունակությամբ փաստելով, որ Հայաստանի եւ Վրաստանի միջեւ բարձր մակարդակի քաղաքական երկխոսությունը եւ տարբեր ուղղություններով համագործակցությունը տարեցտարի խորանում է, Սերժ Սարգսյանն ընդգծել է, որ դա լուրջ նախադրյալներ է ստեղծում գործընկերության նորանոր ուղղություններ նախանշելու համար:

Այս համատեքստում Հանրապետության նախագահը կարեւորել է երկու երկրների իրավական ոլորտը ներկայացնող գերատեսչությունների միջեւ ձեւավորված հարաբերությունները եւ հույս հայտնել, որ իրավական համագործակցության ֆորումը պարբերական բնույթ կկրի՝ իր ներդրումը բերելով հայ-վրացական բարեկամական կապերի առավել ամրապնդմանն ու զարգացմանը: Սերժ Սարգսյանն ընդգծել է, որ հիշյալ գերատեսչությունների կողմից քննարկվող հարցերը հիմնականում վերաբերում են այն խնդիրներին, որոնց հետ առնչվում են Հայաստանի եւ Վրաստանի քաղաքացիները, ուստի կարեւոր է, որ դրանք երկկողմ քննարկումների, փորձի փոխանակման շնորհիվ արդյունավետ լուծումներ ստանան, եւ քաղաքացիներն զգան կատարված բարելավումները:

Հանդիպման առիթով Սերժ Սարգսյանը եւս մեկ անգամ իր անկեղծ զորակցությունն է հայտնել Վրաստանի բարեկամ ժողովրդին՝ Թբիլիսիում տեղի ունեցած հեղեղումների ու տարերային աղետի կապակցությամբ եւ հույս հայտնել, որ Վրաստանի կառավարությունն ու Թբիլիսիի քաղաքային իշխանությունները կանեն ամեն հնարավորը՝ այդ աղետի հետեւանքների շուտափույթ հաղթահարման համար: Հանրապետության Նախագահը Հայաստանի կողմից կրկին պատրաստակամություն է հայտնել՝ անհրաժեշտության դեպքում աջակցություն ցուցաբերել բարեկամ Վրաստանին:

Հանդիպմանը Սերժ Սարգսյանն ընդգծել է նաեւ, որ մեր երկիրը շահագրգռված է ԵԱՏՄ-ին անդամակցելուց եւ Վրաստանի՝ ԵՄ-ի հետ ասոցացման համաձայնագրի ստորագրումից հետո նոր պայմաններում շարունակել հայ-վրացական միջպետական հարաբերությունները զարգացնել եւ խորացնել:

Նախարարներ Թեա Ծուլուկիանին եւ Գիորգի Մղեբրիշվիլին ընդգծել են, որ Հայաստանի արդարադատության նախարարի Վրաստան կատարած այցի ժամանակ երկու երկրների միջեւ իրավական ոլորտում ձեւավորված համագործակցության ներկայիս ձեւաչափը մտադիր են պահպանել եւ ֆորումը դարձնել ավանդական, փորձի փոխանակում իրականացնել ու զարգացնել համագործակցությունը՝ ի նպաստ երկու բարեկամ երկրների: