Նախարար Գաբրիել Ղազարյանը Մինսկում ներկա է գտնվել արագ և բլից շախմատի Եվրոպայի առաջնության բացմանը

 Բելառուսի Հանրապետության մայրաքաղաք Մինսկում գտնվող ՀՀ սպորտի և երիտասարդության հարցերի նախարար Գաբրիել Ղազարյանը ներկա է գտնվել արագ և բլից շախմատի Եվրոպայի առաջնության բացման հանդիսավոր արարողությանը:

Նախարարը հանդես է եկել ողջույնի խոսքով՝ շնորհակալություն հայտնելով կազմակերպիչներին գեղեցիկ միջոցառման համար:«Վստահ եմ, որ այս մրցաշարին մասնակցում են Եվրոպայի ուժեղագույն շախմատիստները: Ես իհարկե երկրպագելու եմ հայ շախմատիստներին, սակայն բոլորմասնակիցներին ի սրտե մաղթում եմ հաջող մրցելույթներ»,-ինչպես «Արմենպրես»-ին տեղեկացրին ՀՀ սպորտի և երիտասարդության հարցերի նախարարության տեղեկատվության և հասարակայնության հետ կապերի բաժնից, իր խոսքում նշել է Գաբրիել Ղազարյանը:

2015 թվականի դեկտեմբերի 18-20-ն անցկացվող արագ և բլից շախմատի Եվրոպայի առաջնությանը Հայաստանը ներկայացնում են գրոսմաստերներ Սերգեյ Մովսիսյանը, Գաբրիել Սարգսյանը, Հրանտ Մելքումյանը, Տիգրան Լ. Պետրոսյանը, Զավեն Անդրեասյանը, Գևորգ Հարությունյանը և միջազգային վարպետ Դավիթ Գևորգյանը:

Նախօրեին նախարար Գաբրիել Ղազարյանը, Մինսկի ջրային մարզաձևերի պատրաստման օլիմպիական հանրապետական կենտրոնում ներկա է գտնվել Բելառուսի Հանրապետության ջրացատկի գավաթի խաղարկության եզրափակիչ մրցելույթներին, որին մասնակցել են նաև Մինսկում ուսումնամարզական հավաք անցած Հայաստանի հավաքականի մարզիկները:

Նախարար Ղազարյանը Բելառուսի Հանրապետության սպորտի և տուրիզմի նախարար Ալեքսանդր Շամկոյի հետ հանդիպման ընթացքում քննարկել է տարբեր մարզաձևերում երկու երկրների համագործակցության հարցերը, մասնավորապես` ջրացատկի և դահուկային սպորտի:

Նախատեսվում է նաև նախարարի այցելությունները Ֆիզիկական կուլտուրայի Բելառուսի պետականինստիտուտ, 3-ից 6 տարեկան  երեխաների շախմատի դպրոց, Ա. Վ. Մեդվեդի անվան ըմբշամարտի պալատ, ձիասպորտի և ձիաբուծության օլիմպիական հանրապետական կենտրոն, ինչպես նաև շրջայց Բելառուսի ազգային օլիմպիական կենտրոնում: