Հայ առաքելական եկեղեցու ամենաերիտասարդ թեմն ամենահարուստն է եկեղեցիներով

 Հայ առաքելական եկեղեցու ամենաերիտասարդ թեմում՝ Արթիկում, հաջորդ տարի արդեն սկսված ձեռնարկների շարունակություն ու նոր ծրագրեր են սպասվում:  2015  թվականին կատարվածի և հաջորդ տարի կատարվելիքի մասին  թեմի առաջնորդական տեղապահ Տեր Նարեկ վարդապետ Ավագյանը «Արմենպրես»-ին ներկայացնելուց առաջ հպարտությամբ նշեց, որ այս թեմը հայ առաքելական եկեղեցու «ամենահարուստ» թեմն է՝ իր գործող եկեղեցիների թվով:  Թեմի գրեթե ամեն մի համայնք ունի եկեղեցի. Արթիկի թեմի 22 համայնքներիից 16-ն ունի եկեղեցի:

«Ուրախությամբ պետք է ասեմ, որ գրեթե ամեն գյուղում եկեղեցի ունենք: Սա այն թեմն է, որն ավելի շատ գործող եկեղեցի ունի, քան չգործող: Աստծո կամոք, 2016 թվականին   վերանորոգումից հետո կվերաօծվեն նաև թեմի Հայկասար համայնքի Սբ Աստվածածին (19-րդ դար), Սարատակ համայնքի Սուրբ Մինաս (19-րդ դար) և Սարալանջ համայնքի Սբ Աստվածածին (5-10րդ դարեր) եկեղեցիները: Այս երեք եկեղեցիները վերաօծելուց հետո թեմում եկեղեցիների վիճակը բավական բարվոք կլինի»,-նշեց թեմի առաջնորդական տեղապահը` փաստելով, որ թեմի եկեղեցաշինության համար ամենամտահոգ թեման այս պահին 7-րդ դարի Նոր Կյանքի եկեղեցին է:

«Եթե կարողանանք այս եկեղեցին վերանորոգել, ապա Նոր Կյանք և Հոռոմ համայնքները կունենան աղոթատեղի: Հիմա այս համայնքների հավատացյալ ժողովուրդը պատարագների ու եկեղեցական արարողությունների մասնակցում է Վարդաքարում, որը շատ ավելի փոքր է: Լուսակերտում ևս ունենք եկեղեցի, որը  թեեւ կանգուն է, բայց չգործող: Ամեն դեպքում, թեմը փոքր է և ինքնաբավ չէ և չի կարող ինքնուրույն նորոգումներ իրականացնել առանց բարերարների ու բարի կամք ունեցող մարդկանց աջակցության: Այս գործընթացը թեմում արդարացված է, քանի որ այս բոլոր եկեղեցիները նման սկզբունքոÕ ¾ են նորոգվել: Տեսնենք հաջորդ տարի ինչ կստացվի, բայց, այսքանով հանդերձ, բավականին մխիթարական վիճակ է: Անշուշտ, յուրաքանչյուր առաջնորդի նպատակն է, որ իր տարածքում չգործող կամ խոնարհված եկեղեցի չլինի»,-նշեց Տեր Նարեկ վարդապետ Ավագյանը:

Խոսելով նոր եկեղեցիներ կառուցելու փոխարեն հինը նորոգելու անհրաժեշտության մասին՝ հայր Նարեկը նշեց, որ  ինքն ավելի կողմնակից է հին եկեղեցիները նորոգելուն, բայց, շատ դեպքերում, հատկապես երբ բարերարներն են դա իրականացնում, վերջիններիս համար ֆինանսական առումով շատ դյուրին է նորը կառուցել, քան դարավոր եկեղեցիները նորոգել:

Գյուղերում հոգևոր կյանքի ակտիվացմանը նպաստում  են պարբերաբար իրականացվող հանդիպումներն ու առաջնորդի ձեռամբ մատուցված պատարագները: Թեեւ թեմի առաջնորդական տեղապահ Տեր Նարեկ վարդապետ Ավագյանի համար թեմում իր նշանակման այս 4 ամիսները կարելի է դեռ ճանաչողական համարել, սակայն, այս ընթացքում  յուրաքանչյուր շաբաթ եւ կիրակի օրերին թեմակալ առաջնորդը  պատարագներ է մատուցում  որեւէ համայնքում, այսպիսով  թեմի 11 համայնքում արդեն պատարագ մատուցվել է առաջնորդի ձեռամբ:

«Եկեղեցին միայն քարեղեն կառույցը չէ, այլ ժողովուրդն է, և դրա համար նախ մարդու մեջ պետք է կառուցել եկեղեցին, հետո մարդը շատ ավելի եկեղեցիներ կկառուցի: Այստեղ հավատացյալ մեծ բանակ կա: Բազմիցս եմ ասել՝ շատ գոհ եմ ժողովրդից, ինչը խոսում է տարիներ շարունակ այստեղ ծառայած հոգևորականների, առավել ևս Միքայել սրբազանի գործունեության մասին: Որքան էլ որ եկեղեցին շքեղ լինի, եթե աղոթք չի հնչում այդ եկեղեցու պատերից ներս, ուրեմն այն կդադարի որպես եկեղեցի ծառայել:

Փառք Աստծո, մենք այդ խնդիրը չունենք, հակառակը, մենք դեռ եկեղեցի նորոգելու ու խոնարհված եկեղեցիները վերականգնելու պանաջը ունենք, և այս գործընթացը նմանվում է սարից իջնող ձնագնդի, որը տարիների ընթացքում մեծանում է, և եթե ասում ենք, որ 22 գյուղ ունեցող թեմն այսօր ունի 16 եկեղեցի, սա վերը նշվածի ամենավառ ապացույցն է: Փոխարենը թեմն ունի հոգևորականների խնդիր. 22 գյուղ և 1 քաղաք ունեցող թեմն ունի ընդամենը 4 քահանա, ինչը թերացում է առաջացնում պարզապես ֆիզիկապես չհասցնելու հտևանքով. քահանան  ստիպված է 1 շաբաթվա ընթացքում 10 գյուղ այցելել, բայց միայն գյուղով չէ, պետք է նաև, օրինակ, դպրոցներ այցելել: Նվազագույնը 1 քահանայի կարիք ունի թեմն այսօր, բայց, մինչ Մայր Աթոռին այս հարցով դիմելը, նախ պետք է լուծվի քահանայի  կեցության հարց:  Այս հարցը լուծելու դեպքում կլուծվի նաև հիմնական հարցը»,-հավելեց թեմի առաջնորդական տեղապահ Տեր Նարեկ վարդապետ Ավագյանը` հույս հայտնելով, որ հաջորդ տարի ավելի լավ լուրերով ու նորություննեով կամփոփվի տարին, քանի որ այդ ներուժը, կարողությունն  ու ցանկությունը կա:

Արմենուհի Մխոյան